कांग्रेस महाधिवेशन : पहिलो चरणमा सभापतिको मतगणना सुरु

काठमाडौं । नेपाली कांग्रेसको नयाँ नेतृत्व चयनका लागि सोमबार भएको मतदानको सभापतितर्फको मतगणना सुरु भएको छ । राजधानीको राष्ट्रियसभा गृहमा मतगणना सुरु भएको हो ।

सोमबार १२ बजेदेखि भएको मतदान राति साढे ११ बजेसम्म चलेको थियो भने सो मतदानमा कुल ४ हजार ७४३ मतदातामध्ये ४६७९ मत खसेको थियो ।

राति १ बजेबाट सुरु गर्ने भनिए पनि सभापतिका प्रतिनिधिहरु समयमा नआइपुग्दा मत गणना समयमा सुरु हुन नसकेको हो । करिब साढे ३ बजेबाट मत गणना सुरु भएको निर्वाचन समितिले जनाएको छ ।

मतदान सकिएसँगै मतपेटिका सिलबन्दी गर्ने, मुचुल्का तयार गर्ने जस्ता प्रक्रियाहरु पुरा गरेर मतगणना सुरु गरिएको हो ।

सभापतिको अन्तिम मत परिणाम आइसकेपछि अन्य पदाधिकारी तथा सदस्यहरुको मत गणना सुरु गरिनेछ ।