काँग्रेस बन्दसत्रमा जे देखियो, प्रतिनिधि नहुँदा कुर्सी खाली

नेपाली काँग्रेसको १४ औं महाधिवेशन अन्तरगत शुक्रबार राति भृकुटीमण्डपमा बन्दसत्र चलिरहेको छ। तर बन्दसत्रमा कुल प्रतिनिधिमध्ये एक तिहाइको पनि सहभागिता नरहेको एक प्रतिनिधिले जानकारी दिए ।

बन्दसत्र राति भएको तथा छलफलको एजेण्डा पनि खासै नभएकाले अधिकांश प्रतिनिधि घरतिर लागेका हुन् ।
यस्तै रामचन्द्र पौडेल पक्षधर नेताहरु पनि छुट्टै छलफलमा लागेका छन् ।

नेपाली कांग्रेसको १४औँ महाधिवेशनको बन्द सत्र भृकुटीमण्डपको हलमा आज राति करिब ९ बजेदेखि सुरु भएको छ । बन्द सत्र सुरु भएको र बन्द सत्रमा महामन्त्रीको प्रतिवेदन, केन्द्रीय नीति, अनुसन्धान तथा प्रशिक्षण प्रतिष्ठानको प्रतिवेदन र लेखा समितिको प्रतिवेदन पेश हुने पार्टीका प्रवक्ता विश्वप्रकाश शर्माले जानकारी दिए ।

बन्द सत्रमा १४औँ महाधिवेशन तयारीका क्रममा कांग्रेस केन्द्रीय कार्यसमितिको निर्णयबमोजिम विधानको विभिन्न धारा उपधारा व्याख्या, वाधा अड्काउ फुकाउ र निलम्वन गर्ने निर्णय अनुमोदनका लागि प्रस्तुत गरिएको प्रतिवेदन पेश गरिएको छ ।

पेश गरिएका प्रतिवेदनउपर छलफल गरी पारित गरिनेछ । यस महाधिवेशनमा कांग्रेस नेतृत्व चयन गर्ने महाधिवेशन प्रतिनिधिको सङ्ख्या जम्मा चार हजार ७४३ कायम रहेको छ । पार्टीको केन्द्रीय निर्वाचन समितिका अनुसार १६५ सङ्घीय निर्वाचन क्षेत्र, भ्रातृ तथा शुभेच्छुक संस्था र विदेशस्थित जनसम्पर्कबाट गरी उक्त सङ्ख्यामा महाधिवेशन प्रतिनिधिहरु चयन भएका हुन् ।