काठमाडौं । नेकपा एमालेका अध्यक्ष केपी शर्मा ओली आगामी १०औँ महाधिवेशनका लागि चितवनतर्फ प्रस्थान गर्दै छन् ।
बिहीबार दिउँसो पूर्वप्रधानमन्त्री समेत रहेका अध्यक्ष ओली चितवनतर्फ प्रस्थान गर्न लागेका हुन् ।
नेकपा एमाले चितवनले आयोजना गरेको कार्यक्रममा सहभागी हुन साथै महाधिवेशन केन्द्रित ब्रिफिङका लागि त्यसतर्फ प्रस्थान गर्न लागेका हुन् ।
यसबारेमा लोकपथलाई जानकारी दिँदै एमाले कार्यालय सचिव शेरबहादुर तामाङले भने, ‘चितवन जिल्लाले आयोजना गरेको कार्यक्रममा भाग लिन अध्यक्ष ओली आज त्यसतर्फ प्रस्थान गर्दै हुनुहुन्छ । भोलिबाट हुने महाधिवेशनका लागि नेता कार्यकर्ताहरुलाई ब्रिफिङ गर्ने कार्यक्रम समेत रहेको छ ।’
त्यसैगरी अध्यक्ष ओलीले नेता कार्यकर्ता साथै बुद्धिजीवीहरुसँग अन्तरक्रिया गर्ने समेत कार्यक्रम रहेको तामाङले बताए ।
तामाङका अनुसार आज रातिसम्म पदाधिकारीहरुको अन्तिम टुंगो लाग्नेछ ।
भोलि (शुक्रबार) बाट हुने एमालेको महाधिवेशनका लागि चितवनको नारायणी किनारमा तयारी तीव्र पारिएको छ ।
भोलिबाट ३ दिनसम्म चल्ने महाधिवेशनमा लागि २ हजारभन्दा बढी प्रतिनिधि चयन गरिएको छ भने महाधिवेशनमा सहभागी हुनेहरुको लागि खानपान र बसोबासको व्यवस्था गरिएको छ ।
यो खबर पढेर तपाईलाई कस्तो महसुस भयो ?
प्रतिक्रिया