काठमाडौं । जर्जियाको विपक्षी दलका नेता तथा पूर्वराष्ट्रपति मिखाइल साकाश्भीलीले आमरण अनसन अन्त्य गरेका छन् । जर्जियाको कारागारभित्रै अनसन सुरु भएको ५० दिनपछि शनिबार उनले अनसान अन्त्य गरेका हुन् ।
अनसनका कारण स्वास्थ्य अवस्था अत्यन्त नाजुक भएपछि निजि चिकित्सकको सल्लाहमा उनले हालका लागि अनसन अन्त्य गरेका जनाइएको छ ।
कारागारमा अनसानका कारण स्वास्थ्य अवस्था बिग्रिएपछि उनलाई सैनिक अस्पतालमा स्थानान्तरण गरिएको छ ।
आफुलाई राजनीतिक पूर्वाग्रहका आधारमा गिरफ्तार गरेर जेलमा राखिएको भन्दै उनले आफुलाई तत्काल रिहा गर्न माग गर्दै कारागारमै अनसान बसेका थिए ।
अनसन गरिरहेका बेला ५३ वर्षीय नेता साकाश्भीली गत बिहीबार बेहोस भएका थिए । चिकित्सकले उनलाई तत्काल अस्पताल लैजान सुझाव दिएका थिए ।
उनलाई नियमित स्वास्थ्य परीक्षण गर्नेगरी चिकित्सकको निगरानीमा राख्नु पर्ने र त्यसो गर्न नसकेमा उनको जीवन नै खतरामा रहेको चेतावनी चिकित्सकले दिएका थिए ।
चिकित्सकको सुझाव र सिफारिसका आधारमा न्याय मन्त्री राती ब्रेगाड्जले शुक्रबार उनलाई अस्पताल लैजान अनुमति दिएका थिए ।
“उहाँको स्वास्थ्य र सुरक्षाका लागि राज्य सधैँ तत्पर छ,” मन्त्री ब्रेगाड्जले भने । उनले विपक्षी नेता साकाश्भीलीको स्वास्थ्य र सुरक्षाका लागि सबै उपाय अपनाउन सरकार तयार रहेको पनि स्पष्ट पारेका थिए ।
विपक्षी नेता साकाश्भीलीले अनसन तोडेपनि आफ्नो आन्दोलन र माग भने यथावत रहेको स्पष्ट पारेका छन् ।
“मैले पूर्वाग्रहपूर्ण तरिकाले मलाइ कारागार राखिएको विषयलाई स्वभाविक मानेको छैन, म यसलाई अवैध र अवैधानिक नै मान्छु, म स्विकार गर्दिन,” उनले भनेका छन् ।
आफुलाई गरिएको अन्यायका विरुद्धमा आफू बाँचुन्जेल लडिरहने र प्रतिवाद गरिरहने अठोट पनि उनले व्यक्त गरेका छन् ।
सन् २०१८ मा उनलाई वर्षे जेल सजाय तोकिएको हो । पदमा रहँदा शक्ति र श्रोत साधनको दुरुपयोग गरेको आरोपमा उनलाई कारागार चलान गरिएको थियो ।
त्यस आरोपलाई उनले भने अस्विकार गर्दै आएका छन् । अहिलेको सत्ताधारीले आफुलाई राजनीतिक पूर्वाग्रहका आधारमा दोषी देखाएर कारागारमा राख्न लगाएको उनको दावी छ ।
स्वास्थ्य अवस्था अति जटिल हुँदासमेत उनले आफ्नो अडान र दावीलाई दृढताका साथ कायमै राखेका छन् ।
चिकित्सकले उनको अवस्था अहिले पनि खतरापूर्ण रहेको जानकारी दिएका छन् । तर सुधार भने हुन थालेको उनीहरुले बताएका छन् ।
यो खबर पढेर तपाईलाई कस्तो महसुस भयो ?
प्रतिक्रिया