खानेपानी संस्थानका प्रमुखलाई दुर्व्यवहार गर्ने सीके राउतका १३ कार्यकर्ता पक्राउ

काठमाडौं । जनकपुरस्थित खानेपानी संस्थानका निमित्त प्रमुखमाथि दुर्व्यवहार गर्ने सीके राउतका १३ कार्यकर्ता पक्राउ परेका छन् ।

जनकपुरको खानेपानी संस्थानका निमित्त प्रमुख राजेश कशवाहालाई दुर्व्यहार गरेको भन्दै प्रहरीले १३ जनालाई पक्राउ गरेको हो । आफ्ना कार्यकर्ताहरुलाई पक्राउ गरिएको भन्दै सीके राउत नेतृत्वको जनमत पार्टीका अन्य कार्यकर्ताहरु धर्नामा बसेका छन् ।

बिहीबार लाठीसहित जनकपुर उपमहानगरपालिका घेराउ गर्न आएका उनीहरुले कुशहवाको लुगा खोलेर हिलो छ्याप्दै बजार घुमाएका थिए । खानेपानी कार्यालयले सडकमा ढल निकासीमा ध्यान नदिएको र कुशहवामाथि भ्रष्ट्राचारको आरोप रहेको भन्दै उनीहरुले दुर्व्यवहार गरेका हुन् ।

पक्राउ परेका उनीहरुलाई जिल्ला प्रहरी कार्यालय धनुषामा राखिएको छ ।