देशभरका सेवा अवरुद्ध गर्ने यातायात समितिका पदाधिकारीलाई पक्राउ गर्न गृहमन्त्रीको निर्देशन

काठमाडौं । देशभरका सेवा अवरुद्ध गर्ने यातायात व्यवसायी समितिका पदाधिकारीलाई पक्राउ गर्न गृहमन्त्री रामबहादुर थापा ‘बादल’ले निर्देशन दिएका छन् । 

जिल्ला प्रशासन कार्यालयहरुलाई परिपत्र गर्दै  गृहमन्त्री बादलले  अत्यावश्यक सेवा सञ्चालन ऐनअनुरुप कारवाही गर्न निर्देशन दिएका हुन् ।

अत्यावश्यक सेवामा बन्द र हड्ताल गर्न नपाउने कानुन बमोजिम सार्वजनिक यातायात बन्द गराउने यातायात समितिका पदाधिकारीलाई पक्राउ गर्न प्रहरी परिचालन गर्ने गृहमन्त्रालय स्रोतले बतायो । 

सिन्डिकेट पक्षधर यातायात व्यवसायीले सिन्डिकेट खारेज गर्ने सरकारी निर्णयको विरोधमा शुक्रबार मुलुकभर सार्वजनिक यातायात सेवा बन्द आव्हान गरेका छन् ।