बन्दै गरेको घर धितो राखेर भूकम्प पीडितलाई ३ लाख निर्ब्याजी ऋण दिइने

काठमाडौँ, २३ असोज- सरकारले भूकम्प पीडितको पक्षमा महत्वपूर्ण निर्णय गरेको छ । आज बसेको मन्त्रिपरिषद् बैठकले भूकम्पपीडितको घर निर्माणका लागि धितो जमानीबाट निर्ब्याजी  ऋण उपलब्ध गराउने निर्णय गरेको छ ।अर्थमन्त्री ज्ञानेन्द्रबहादुर कार्कीले बन्दै गरेको घर धितो राखेर ३ लाख निर्ब्याजी ऋण  उपलब्ध गराउने निर्णय भएको जानकारी दिए ।सरकारले भूकम्प पीडितहरुलाई सामुहिक जमानीमा निब्र्याजी ऋण उपलब्ध गराउने कार्यविधि बनाएको थियो । तर, बैंकहरुले विना धितो ऋण दिन अस्वीकार गरेपछि सरकारले कार्यविधि संशोधन गरेर धितो जमानी राख्ने व्यवस्था गरेको हो ।यस्तै भूकम्पपछि पुनः निर्माण गरेर दोस्रो किस्ताका लागि योग्य लाभग्राहीले गाउँपालिका÷नगरपालिकाको सिफारिशमा अग्रिम रुपमा तेस्रो किस्ता पनि पाउने भएका छन् ।स्थानीय तहको जिम्मामा लाभग्राहीले पाँच महिनाभित्र घर सम्पन्न गर्ने शर्तमा तेस्रो किस्ता आवास अनुदान पाउने व्यवस्था भएको राष्टिय पुनः निर्माण प्राधिकरणले जनाएको छ ।निजी आवास निर्माणमा लाभग्राहीलाई अग्रिम रुपमा तेस्रो किस्ताको रकम उपलब्ध होस् भनी प्राधिकरणले गरेको प्रस्तावलाई अर्थ मन्त्रालयले स्वीकृति दिएको प्रवक्ता यमलाल भुसालले बताए ।

यो खबर पढेर तपाईलाई कस्तो महसुस भयो ?