काठमाडौं। इङ्ल्यान्ड भ्रमणमा रहेको भारतले तेस्रो टेस्टमा लज्जास्पद सुरुवात गरेको छ।
लिड्सस्थित हेडिङले ओभलमा बुधवार टस जितेर ब्याटिङ रोजेको भारत पहिलो इनिङको खेलमा ७८ रनमै समेटियो। भारतका लागि रोहित शर्मा र उप-कप्तान अजिन्क्या राहानेले मात्र दुई अंकमा रन बनाउन सफल भएका थिए।
१ रनको स्कोरमा भारतले आफ्नो ओपनर के.एल. राहुललाई गुमाएको थियो। इङ्ल्यान्डका लेजेन्डरी बलर जेम्स एन्डरसनले राहुललाई डक आउट गरेका थिए।
त्यसपछि एन्डरसनले भेट्रान ब्याट्सम्यान चेतेश्वर पूजारा र कप्तान विराट कोहलीलाई पनि क्रमशः १ र ७ रनमा पविलियन फर्काएका थिए। अन्य ब्याट्सम्यानमा विकेट किपर ऋषभ पन्तले २, रवीन्द्र जडेजाले ४ र ईशान्त शर्माले अविजित ८ रन बनाउन सफल भए।
पहिलो इनिङमा मोहम्मद शमी र जसप्रित बुम्राह पनि डक आउट हुन पुगे। त्यस्तै मोहम्मद सिराजले ३ रनको योगदान दिएका थिए। घरेलु टोलीका लागि जेम्स एन्डरसन र क्रेग ओभरटनले समान ३-३ विकेट लिन सफल भए। त्यस्तै ओली रबिन्सन र स्याम करनले समान २-२ विकेट लिए।
जवाफी ब्याटिङमा इङ्ल्यान्डले शानदार सुरुवात गरेको छ। पहिलो दिनको खेल सकिँदासम्म घरेलु टोलीले ४२ ओभरमा बिना कुनै क्षति १२० रन जोडेको छ। इङ्ल्यान्डका लागि ओपनरद्वय रोरी बर्न्स र हासिब हमिदले क्रमशः ५२ र ६० रन बनाएका छन्।
यो खबर पढेर तपाईलाई कस्तो महसुस भयो ?
प्रतिक्रिया