गण्डकी प्रदेश सरकारलाई एमालेले गरायो ध्यानाकर्षण (पत्रसहित)

काठमाडौं । गण्डकीमा प्रमुख प्रतिपक्षी दल नेकपा एमालेले प्रदेश सरकारको ध्यानाकर्षण गराएको छ ।

आज नेकपा एमालेले ठूला योजनामा बजेट कटौती गरेर खुद्रा योजनामा बजेट वितरण गरेको भन्दै मुख्यमन्त्रीको ध्यानाकर्षण गराएको हो ।

पूर्व मुख्यमन्त्री समेत रहेका नेकपा एमाले गण्डकी प्रदेशका संसदीय दलका नेता पृथ्वीसुब्बा गुरुङले आज पत्र बुझाउँदै आर्थिक वर्ष २०७८र७९ को बजेट तथा कार्यक्रममा गण्डकी प्रदेशलाई समृद्ध बनाउने योजनाहरुमा बजेट कटौती गरेको भन्दै ध्यानाकर्षण पत्र बुझाएका हुन् ।

‘यो सरकारले आर्थिक वर्ष २०७८/७९ को बजेट र कार्यक्रममा गण्डकी प्रदेशलाई समृद्ध बनाउने तमाम योजनाहरुमा बजेट कटौती, कार्यक्रम र योजना खारेज गरेर गण्डकी प्रदेशबासी जनतामाथि ठूलो अन्याय गरेको छ । प्रदेशको प्रथम पञ्चवर्षीय योजना पूरा गर्दै दिगो विकासका लक्ष्य भेट्ने उद्देश्यसहित राखिएका योजनाबद्ध विकासका आयोजनालाई अघिल्लो सरकारले प्राथमिकता दिएको थियो । योजनाबद्ध विकास गर्न त्यसै अनुसार बजेट विनियोजन गरेको थियो । तर गठबन्धन सरकारले ती योजनामा बजेट काट्दा राजनीतिक प्रतिशोधको दृष्टि र पूर्वाग्रह राखेको देखिन्छ । प्रतिशोध र पूर्वाग्रह लोकतान्त्रिक चरित्र होइन । वास्तवमा त्यो प्रतिशोध र पूर्वाग्रहपूर्ण व्यवहारबाट तत्कालीन सरकारको नेतृत्व गरेको पार्टी नेकपा (एमाले) लाई होइन गण्डकी प्रदेश र समृद्ध प्रदेशको जनताको चाहनामाथि कुठाराघात हुन पुगेको हाम्रो ठहर छ।’ ध्यानाकर्षण पत्रमा भनिएको छ ।