सालकको खपटासहित दुई जना बालाजुबाट पक्राउ

काठमाडौं । केन्द्रीय अनुसन्धान ब्यूरो (सीआईबी)ले संरक्षित वन्यजन्तु सालकको खपटा ओसारपसार गर्ने दुई जनालाई पक्राउ गरेको छ ।

सीआईबीद्वारा खटिएको प्रहरीको टोलीले राजधानीको बालाजुबाट मकवानपुर बकैयाँ गाउँपालिका निवासी कान्छालाल मोक्तान र धनबहादुर योञ्जनलाई पक्राउ गरेको हो ।

विशेष सूचनाको आधारमा अवैध रूपमा ओसारपसार गरिरहेको डेढ किलोग्राम सालकको खपटासहित काठमाडौंबाट उनीहरुलाई पक्राउ गरिएको सीआईबीका प्रवक्ता श्याम महतोले जानकारी दिए ।

पक्राउ परेका दुबै जनालाई थप कारबाहीका लागि डिभिजन वन कार्यालय हात्तीसार काठमाडौंमा बुझाइएको सीआईबीले जनाएको छ ।