वृद्धवृद्धा र अपांगता भएकालाई घरमै गएर खोप लगाउने व्यवस्था गर्न सर्वोच्चको आदेश

काठमाडौं । सर्वोच्च अदालतले वृद्धवृद्धा र अपांगता भएका व्यक्तिलाई घरमै गएर कोरोनाविरुद्धको खोप लगाउन आदेश दिएको छ ।

न्यायाधीश प्रकाशकुमार ढुंगानाको इजलासले शुक्रबार उनीहरु केन्द्रसम्म आउन नसक्ने भएकाले घरमै गएर खोप लगाइदिन सरकारलाई आदेश दिएको हो ।

अधिवक्ता प्रवेश केसीले दिएको रिटमा पहिलो सुनुवाइ गर्दै न्यायाधीश ढुंगानाको इजलासले यस्तो आदेश दिएको हो। संविधानमा नागरिकलाई स्वास्थ्य सेवामा समान पहुँचको हक हुने भनी संरक्षण प्रदान गरेको र धारा ४१ ले जेष्ठ नागरिकलाई राज्यबाट विशेष संरक्षण तथा सामाजिक सुरक्षाको हक हुने भनी मौलिक हकको प्रचलनको लागि संवैधानिक उपचारको हकसमेत सुरक्षित गरेको पनि आदेशमा उल्लेख छ।