‘मलाई शेरबहादुर देउवा मनपर्छ किनभने…’ प्रकरणबारे सहमहामन्त्री महतको धारणा के छ ?

काठमाडौं । नेपाली कांग्रेसका सहमहामन्त्री डा. प्रकाशशरण महतले आफूले बोल्दै नबोलेको कुरा सञ्चारमाध्यममा आएको भन्दै आपत्ति जनाएका छन् ।

उनले आज एक विज्ञप्ति प्रकाशन गरी प्रधानमन्त्रीको उपस्थितिमा सिमित निकटस्थ सहयोगी र नेताहरुका बिचमा राखेका कुरालाई जोडेर ‘मलाई शेरबहादुर देउवा मलाई मनपर्छ किनभने’ भन्ने भिडियोको पक्षमा बोल्यो भन्दै नभनेका कुरा सञ्चार माध्यमहरुमा एकपछि अर्कोगरी सुनियोजित रुपमा सम्प्रेषण गरिएकोमा आफ्नो गम्भीर ध्यानाकर्षण भएको बताएका हुन् ।

आज सहमहामन्त्री डा. महतले एक विज्ञप्ति जारी गर्दै सो विषयमा आपत्ति जनाउँदै आफ्नो धारणा सार्वजनिक गरेका हुन् । उनले विज्ञप्तिमा भनेका छन्– ‘प्रधानमन्त्री देउवाले आफ्नो जीवनको विभिन्न कालखण्डमा सत्तामा हुदा र नहुदा गरेका राम्रा कामहरुलाई उल्लेखित भिडिओमा प्रस्तुत गरेको भन्दा तथ्य र आधारसहित परिपक्क र भिन्न तरिकाबाट सम्प्रेषण गर्न सकिन्थ्यो भन्ने मलाई पनि लागेको । प्रधानमन्त्री वा उहाँको सहयोगीले गरेको कुनै कार्यले प्रधानमन्त्रीको छविलाई हानी गरेको छ भन्ने लागेमा प्रधानमन्त्रीको निरन्तर पहुँचमा रहेका नेता र निकटस्थहरुले सिधै प्रधानमन्त्रीलाई भनेर सच्याउन सकिने र त्यसका लागि सामाजिक संजालको सहयोग लिनुुपर्ने अवस्था के परिस्थितिले आइपरेको हो भनेर उक्त छलफलमा मैले जिज्ञासा मात्र राखेको हो’– डा महतले विज्ञप्तिमा भनेका छन् ।

उनले नेतृत्व तहबाट कुनै कमी कमजोरी भएमा सिधै राख्ने आफ्नो् स्वभाव रहेको बताउँदै त्यसले काम नगरे मात्र संस्थागत र सार्वजनिक रुपमा राख्नुपर्छ भन्ने मान्यता राख्दै आएको र राख्ने बताए ।

‘छलफलका क्रममा भन्दै नभनेको कुरालाई यसरी तोडमोड गरी सञ्चारमाध्यममा त्यहीँ भित्रबाट सम्प्रेषण हुनु दुर्भाग्यपूर्ण भएको सबै सरोकारवाला,पार्र्टीका समर्थक र सुभचिन्तकहरुमा निबेदन गर्दछु ।’ विज्ञप्तिमा उनले भनेका छन् ।