सर्वोच्चद्वारा देवकोटाको घर भत्काएको विषयमा लिखित जवाफ माग

काठमाडौं । सर्वोच्च अदालतले महाकवि लक्ष्मीप्रसाद देवकोटाको घर भत्काउनुको कारण माग गरेको छ ।

सर्वोच्चले नेपाल प्रज्ञा प्रतिष्ठान लगायतका निकायका नाममा आदेश जारी गर्दै देवकोटाको घर भत्काउनुको कारण माग गरेको हो ।

न्यायाधीश तेजबहादुर केसीको इजलासले प्रज्ञा प्रतिष्ठानलगायतका विपक्षीसँग लिखित जवाफ माग गरेको सर्वोच्चका प्रवक्ता बाबुराम दाहालले जानकारी दिए ।

पूरातात्विक महत्वको घर भत्काएको भन्दै अधिवक्ता सञ्जय अधिकारीले रिट दायर गरेका थिए ।

रिट निवेदनमा पूरातात्विक महत्वको घर भत्काउनु गलत भएको भन्दै त्यसले महाकविसँग जोडिएको धरोहर नाश हुने भएकाले संरक्षण गर्न आदेश हुनुपर्ने माग गरिएको छ ।