नेपाली कामदारलाई कोरिया जाने व्यवस्था मिलाउन माग

काठमाडौं । राष्ट्रिय सभा सदस्य गंगा कुमारी बेलबासेले कोरिया जान रोकिएका नेपाली कामदारहरुलाई तत्काल कोरिया जाने व्यवस्था मिलाउन सरकारसँग माग गरेकी छिन् ।

शुक्रवारको राष्ट्रिय सभा बैठकमा बोल्दै सांसद बेलबासेले वैदेशिक रोजगारीका लागि कोरिया जान लागेका कामदारहरु दुई देशबीचमा भएका समस्याहरुका कारण कोरिया जान नपाएको भन्दै उनीहरुलाई कोरिया जाने व्यवस्था मिलाउन सरकारसँग माग गरिन् ।

उनले भनिन् – ‘कोरिया जानका लागि तयार भएर बसेको ठुलो जनसमुदाय अहिले पनि यत्तिकै बसिराखेको छ । उहाँहरुले जानका लागि सबै प्रक्रियाहरु पुरा गर्नुभयो तर यता बाट पठाउने र उताबाट रिशिभ गर्ने दुईदेशको बिचमा केही समस्याहरु भएको कारणले उहाँहरु अड्किराख्नुभएको छ । उहाँहरुको व्यवस्था गरियोस् भन्ने पनि म माग गर्न चाहान्छु ।’

उनले वैदेशिक रोजगारीमा जान लागेकाहरु क्युआर कोडको लागि, भ्याक्सिन र प्रमाणित कार्डको लागि विभिन्न ठाउँमा लाइन बसी राख्नुपर्ने भएकाले लाइन बसिराख्नु नपर्ने खालको व्यवस्था गर्नको लागि पनि सरकारसँग अनुरोध गरिन् ।