एमाले अध्यक्ष केपी शर्मा ओलीले प्रधानमन्त्रीबाट बाहिरिएको भोलीपल्टै आफ्नो निवास बालकोट पुगेर वरिष्ठ नेता माधव कुमार नेपाललाई पार्टीमा ठाउँ नभएको भन्दै आक्रोस पोखे । एमाले भित्रको आन्तरिक विबादकै कारण ५ वर्षसम्म प्रतिपक्षमा बस्न जनमत पाएको नेपाली कांग्रेस अहिले सरकारको नेतृत्व गर्न पुगेको छ । एमाले भित्रको आन्तरिक कलह कसरी समाधान होला ? संसदमा एमालेको प्रतिपक्षी भूमिका लगायतका विषयमा केन्द्रित रहेर एमालेका कार्यालय सचिव एवं पूर्वमन्त्री शेरबहादुर तामाङसँग लोकपथका लागि रामेश्वर सापकोटाले गरेको कुराकानीको सम्पादित अंश :
एमाले आफ्नै कारण सरकारबाट बाहिरिनु पर्यो । यो स्थिती कसरी आयो ?
आफ्नो कारण त के भन्नु हामी भित्र कतिपय कमी कमजोरीहरु थिए होलान र त्यो हुनुमा केही तत्वहरु मिसिएको छ । एमाले भित्रका आन्तरिक असमझदारीमात्रै कारण रहेनन् । कारणहरु धेरै छन् । ती समयक्रममा खुल्दै जानेछन् । त्यो नेपाली जनताले छर्लङग थाहा पाउनेछन् ।
मेहनतका साथ एमाले बनाउनुभयो । अहिले झण्डै–झण्डै फुटको अवस्थामा पुग्यो । सम्झिदा दुख लाग्दैन ?
एमाले बनाउन लाखौं नेता कार्यकर्ताक र नेपाली जनताको पनि योगदान छ । एमाले बन्नुमा धेरैले बलिदानीपूर्ण संघर्ष गरेका छन् । जनतामा एमाले लोकप्रिय पनि छ । अलि छिट्टै निर्वाचनमा गएर जनमत लिएर आउन चाहन्थ्यो,एमाले । तर प्रतिनिधि सभा पुनः स्थापना भएपछि ढिलो हुने भयो भन्ने मात्रै हो । केही साथीहरु अर्कै पार्टीका नेतालाई प्रधानमन्त्री बनाउन हस्ताक्षर गर्न पुगे । त्यसैको जगमा सर्वाेच्च अदालतले जनमतको विपरित परमादेशले कांग्रेसलाई सत्तामा पुग्ने मौका मिल्यो । जनादेश र परमादेश कुन बलियो भन्ने हामी जनतामा गएर परीक्षण गर्छाै । जनताको जनादेश बोकेर हामी आउँछौं ।
पार्टी अध्यक्ष केपी शर्मा ओलीले पार्टी र सरकार संचालन गर्दा स्वेच्छाचारिता देखाएको आरोप छ,माधव नेपाल पक्षको ?
त्यो गलत आरोप हो । के ओली अर्काे पार्टीको नेतालाई प्रधानन्त्री बनाउन हस्ताक्षर गर्न पुग्नु भएको थियो र ? एमालेको सरकार गिराउन र एमाले सिध्याउन त ओली लाग्नु भएको थिएन नि । उनीहरुले जस्तो अपराध ओलीले गर्नु भएको छैन । ओली एमाले बनाउन र संगठित गर्न लाग्नुभएको छ । ओलीलाई देखाएर उनीहरुको अपराध क्षम्य हुँदैन ।
सर्वाेच्च अदालतको प्रतिनिधि सभा पुनः स्थापनाको फैसलाप्रति असन्तुष्टि जनाउनुभयो । एमाले त बिधिको शासन मान्ने पार्टी होइन र ?
हामी विधिको शासन मान्ने नै हौँ । तर त्यसो भन्दैमा शक्ति पृथकीकरणको सिद्धान्त विपरित न्यायपालिकाले कार्यपालिकाको भूमिका खेल्न थाल्यो भने के हुन्छ ? अहिले विधिको उल्लंघन भएको छ । सर्वाेच्चको फैसला स्वीकार गरेरै एमाले बालुवाटारबाट बाहिरिएको हो । यसको फैसला जनअदालतमा हुन्छ । कुन कुन होटलमा बसेर कता कताको कनेक्सन मार्फत के के गरे भन्ने हामीलाई सबै थाहा छ । हामीले संविधान र कानून सम्मत काम गरेका छौं । यदि हामीले संविधान र जनविरोधी काम गरेका छौ भने जनताले निर्णय गर्छन् ।
अब एमाले एक हुन्छ त ?
एमाले कार्यदलले १० बुँदे सुझाव दिएको छ । जसले त्यसलाई स्वीकार गरेर पार्टीको पक्षमा आउछन् एमाले हुन्छन्,जसले स्वीकार्दैनन् उनीहरु एमालेमा बस्दैनन् ।
पार्टी अध्यक्ष ओलीले प्रधानमन्त्रीबाट हटेको भोलीपल्ट बालकोट निवास पुगेर वरिष्ठ नेता नेपाललाई अब पार्टीमा स्थान छैन भन्नुभयो । के एमालेमा एकता टरेको हो त ?
अब नेपाललाई पार्टीमा राख्ने अवस्था रहेन । कार्यदलले सर्वाेच्च अदालतले प्रतिनिधि सभा विघटनको मुद्धामा फैसला गर्नु अघि शेरबहादुर देउवाको पक्षमा २३ जना एमाले सांसदले गरेको हस्ताक्षर फिर्ता लिनुपर्ने सुझाव दिएको थियो । तर त्यो कार्यान्वयन भएन । अब माधव नेपाल एमाले हुन धेरै घुम्ती बाटो छ । अब उहाँ एमाले हुन त्यति सहज पनि छैन । नेता नेपालकै कारण एमाले सिंहदरवारबाट बाहिरियो ।
देउवा सरकारलाई तपाईहरुको सहयोग के हुन्छ ?
प्रतिनिधि सभा विघटन अवश्यभावी छ । एकमहिना पछि निर्वाचन नै घोषणा हुने हो । हामी विश्वासको मत दिदैनौ । आज कसलाई प्रधानमन्त्री बनाउने र कसले निर्वाचन गराउने भन्ने सेटिङका कारण अदालत बिवादमा मुछियो । अदालत चोखो बस्नुपथ्र्याे ।
यो खबर पढेर तपाईलाई कस्तो महसुस भयो ?
प्रतिक्रिया