सर्वोच्चको फैसलाले देशमा द्वन्द निम्तिएको प्रभु साहको टिप्पणी

काठमाडौं । नेकपा एमालेका नेता प्रभु साहले सर्वोच्चको सोमवारको फैसलाले दलीय प्रणालीको हत्या गरेको टिप्पणी गरेका छन् ।

पूर्वमन्त्री समेत रहेका साहले सर्वोच्च अदालतको फैसलाले दलीय शासन प्रणालीको हत्या गरेर देशमा द्वन्द निम्त्याएको बताए ।

त्यसैगरी सर्वोच्चले कांग्रेस सभापति शेर बहादुर देउवालाई प्रधानमन्त्री बनाउने परमादेशबारे प्रतिक्रिया जनाउदै पूर्वमन्त्री साहले सर्वोच्च अदालतको संसदमा दलिय ह्वीप नलाग्ने आदेश यो व्यवस्थाकै विडम्बना भएको बताए ।

संवैधानिक व्यवस्थाकै कारण आज देशमा संकट निम्तिएको बताउँदै दलीय शासन व्यवस्था प्रणालीमा दलीय अनुशासन लागू हुँदैन भन्ने निर्णय गरेर सर्वोच्च अदालतले दलीय प्रणालीको आत्माको हत्या गरेको उनको टिप्पणी गरे ।

‘दलीय शाशन प्रणाली वर्तमान व्यवस्थाको आत्मा हो, र दलीय प्रणालीको आत्मा हो दलीय अनुशासन । आज सर्वोच्च अदालतले दलीय अनुशासन लागू हुँदैन भन्ने जुन फैसला गरेको छ, यसले दलीय प्रणालीको आत्माको हत्या भएको छ । यसले देशमा द्वन्द्व चर्काउने बाहेक केही गर्न सक्दैन । तपाइँ हामीले हेरिरहेका छौँ कि जुन ढंगले न्यायालय राजनीतिमाथि हाबी भएको छ, यो सबै गलत संवैधानिक प्रावधानकै उपज हो । हामीले भन्दै आएका छौँ कि जुन अहिलेको संविधान छ, त्यो अस्पष्ट र कन्फ्युज्ड व्यवस्थाहरुको फ्युजनवाट बनेको खिचडी संविधान हो । र आजको सर्वोच्च अदालतको फैसलाले वर्तमान व्यवस्था र संविधान असफल भईसक्यो भन्ने पुष्टि गरेको छ ।’  उनले भने ।