फिलिपिन्स विमान दुर्घटना अपडेटः मृत्यु हुनेको संख्या ५० पुग्यो

फिलिपिन्स। फिलिपिन्समा आइतवार भएको सैनिक विमान दुर्घटनामा परेर मृत्यु हुनेको संख्या ५० पुगेको फिलिपिन्सको रक्षा मन्त्रालयले सोमवार जानकारी दिएको छ । फिलिपिन्सको एउटा सैनिक विमान हवाई मैदानमा अवतरण गर्नेक्रममा आइतवार दुर्घटनाग्रस्त भएको थियो ।

त्यसमा परेर आइतवार नै कम्तीमा पनि १७ जनाको मृत्यु भएको बताइएको थियो । सैनिकहरु चढेको उक्त विमानमा सवारमध्ये अरु सबै घाइते थिए । ती घाइतेहरु मध्ये केहीको मृत्यु भएपछि सोमवार मृतकको संख्या ५० पुगेको फिलिपिन्सको रक्षा मन्त्रालयले जानकारी दिएको हो ।

सोमवार एकजना सैनिक जर्नेलले दिएको समाचारमा त्यस दुर्घटनामा ९६ जना यात्रु रहेका र तीमध्ये ५० जनाको ज्यान गएको छ। उनका अनुसार दुर्घटनामा परेर मृत्यु हुनेमा ४७ जना सैनिक छन् । अरु तीन जना गैर सैनिक नागरिक थिए। सो विमान त्यहाँको सेनाको रहेको बताइएको छ ।

सो विमान कागायान डी ओरोबाट दक्षिणी मिन्डानाओ द्वीपतर्फ सैनिकहरु लिएर गैरहेको थियो । उनले जोलोमा विमान अवतरण गर्न लाग्दा नजिकैको आवासीय क्षेत्रमा खसेको पनि बताए । फिलिपिन्सको रक्षा मन्त्रालयले दुर्घटनाको कारणका बारेमा सरकारले अनुसन्धान शुरु गरेको जानकारी दिएको छ । सेनाका प्रवक्ताले सो विमानको दुर्घटनाका बारेमा आइतवार साँझदेखि नै अनुसन्धान शुरु भएको बताएका छन।

• एजेन्सी