काठमाडौं– डा. बाबुराम भट्टराई नेतृत्वको नयाँ शक्ति पार्टी नेपालका चार केन्द्रीय परिषद सदस्यले पार्टी परित्याग गर्दै नयाँ शक्ति समाजबादी पार्टी गठन गर्ने घोषणा गरेका छन् । रामप्रसाद न्यौपाने, प्रकाशराज बगाले, परशुराम गिरी र भरत खतिवडाले नयाँ शक्ति छाड्दै नयाँ शक्ति समाजवादी पार्टी गठन गर्ने घोषणा गरेका हुन् । उनिहरुले आफुहरुसँगै देशभरका ६३ जनाले पार्टी परित्याग गरि समाजबादीमा समाबेश भएको दावी गरेपनि नाम भने खुलाएका छैनन् ।नयाँ पार्टीको नेतृत्वका लागि रामप्रसाद न्यौपानेको संयोजकत्वमा सहसंयोजक भरत खतिवडा, सचिव र प्रवक्तामा परशुराम गिरी र बरिष्ठ नेताको रुपमा प्रकाश राज बगाले रहेको शुक्रबार जारी विज्ञप्तिमा जनाइएको छ । सो पार्टीले निर्वाचन आयोगमा जानकारी गराएर मंसिरमा हुने निर्वाचन लड्ने बताएको छ । त्यसका लागि एमाले र राप्रपाबाहेकका दलसँग तालमेल गर्ने पनि जनाइएको छ ।
