देउवाको पत्रकार सम्मेलन : कोरोना महामारी, एमसीसीदेखि वैकल्पिक सरकार गठनसम्म

काठमाडौं । प्रमुख प्रतिपक्षी दल नेपाली कांग्रेसले कोभिड १९ संक्रमितको उपचारका लागि आवश्यक अक्सिजन, भेन्टिलेटर लगायत स्वास्थ्य सामग्रीको पर्याप्त आपुर्ति गर्न सरकार समक्ष माग गरेको छ ।

शुक्रवार नेपाली कांग्रेसका सभापति शेरबहादुर देउवाले आफ्नै निवास बुढानिलकण्ठमा पत्रकार सम्मेलन गर्दै संक्रमितको उपचार गर्न देशको स्वास्थ्य संरचनाले धान्न नसक्ने अवस्था आएको र आइसियु, बेड, अक्सिजन, भेन्टीलेटरको अभाव भएकाले तत्काल अक्सिजन, भेन्टिलेटरको आपूर्ति सुनिश्चित गर्न सरकार समक्ष माग गरे ।

देशका सम्पूर्ण जिल्लाहरुमा कन्ट्याक्ट ट्रेसिङलाई प्रभावकारी बनाई, सम्भावित संक्रमितको पीसीआर परीक्षणलाई व्यापक गर्न, सिमा नाकाहरुमा अनिवार्य पीसीआर परीक्षण र परिक्षणको नतिजा नआउञ्जेलसम्म होल्डिङ केन्द्रमा राख्ने व्यवस्था गर्न, संक्रमितलाई आइशोलेसनको व्यवस्था गर्न पनि नेपाली कांग्रेसले माग गरेको छ ।

त्यसैगरी स्वास्थ्यकर्मी, सफाइकर्मी र सुरक्षाकर्मीलाई जोखिमभत्ता दिइनुपर्ने, अस्पतालहरुमा थप स्वास्थ्य जनशक्तिको व्यवस्था गर्नुपर्ने, कोभिड विरुद्धको खोप आपुर्तिका लागि प्रभावकारी कुटनीतिक पहल गर्नुपर्ने, र लकडाउनको समयमा कृषि उपजको आपूर्ति र किसानको आवत् जावत्लाई सहज गराउन पनि माग गरिएको छ ।

विदेशमा जानेहरुको संख्यालाई ध्यानमा राखेर आवश्यक पीसीआर परीक्षण गर्न अस्पतालको संख्या बढाइनुपर्ने, लकडाउनका कारण आर्थिक सामाजिक मारमा परेका आम नागरिक, श्रमिक, र व्यवसायीलाई आवश्यक सहयोग, राहतको कार्ययोजना ल्याइनुपर्ने तथा कोभिड संक्रमणबाट बच्न आवश्यक मापदण्डलाई कडाईका साथ लागु गर्न अनुगमन संयन्त्र मजवुत गराउनुपर्ने पनि सभापति देउवाले बताए । साथै सरकारले पूर्वाग्रही भएर प्राविधिक स्वास्थ्य सचिव रिक्त राखेकाले तत्काल प्राविधिक स्वास्थ्य सचिवको व्यवस्था सुनिश्चित गर्न पनि माग गरिएको छ ।

कांग्रेसले कोभिड १९ विरुद्धको सचेतना अभियानमा केन्द्रदेखि स्थानीय तहसम्मका सबै संरचनालाई परिचालन गर्ने प्रतिवद्दता पनि व्यक्त गरेको छ । लकडाउनका कारण आर्थिक, सामाजिक समस्यामा परेकाहरुलाई सहयोग अभियान चलाइने पनि प्रतिबद्दता गरेको छ । साथै संयुक्त राज्य अमेरिकाले नेपाललाई खोप सहयोग गर्ने निर्णयको स्वागत गर्दै अन्य विकसित राष्ट्रसँग खोप सहयोगको लागि अनुरोध समेत गरको छ ।

कांग्रेस सभापति देउवाले वर्तमान अवस्थाको सिर्जना हुनुमा सरकारको चरम लापरबाही, असंवेदनशिलता, अर्कमण्यता जिम्मेवार रहेको र सरकारले कसैको सल्लाह सुझावलाई आत्मसात् नगरेको बताए । कोरोना संक्रमण रोक्न सरकारले कुनै ठोेस काम नगरेको सभापति देउवाको भनाई छ । उनले उपत्यकामा निषेधाज्ञा गर्ने सरकारको निर्णयसँगै कोभिड १९ को परिक्षण नगरी उपत्यका छोड्ने समय दिएका कारण लाखौँ मानिसहरु कम संक्रमित भएका जिल्लाहरुमा पुग्नाले व्यापक संक्रमणको खतरा रहेको पनि बताए ।

नेपाली कांग्रेसका सभापति शेरबहादुर देउवाले नेपाली कांग्रेसको महाधिवेशन निर्धारित मितिमै हुने बताए छ ।

पत्रकार सम्मेलनमा सञ्चारकर्मीहरुको प्रश्नको जवाफ दिने क्रममा सभापति देउवाले संविधान अनुरुप पार्टी महाधिवेशन धकेल्न नमिल्ने भन्दै उनले महाधिवेशन गर्नुको विकल्प नरहेको बताए । उनले भने– ‘विकल्प केही छैन । नेपालको संविधान अनुसार हुनैपर्छ यो कुनै हालतमा पनि ।’

सभापति देउवाले वैशाख १५ गतेको लागि तय भएको केन्द्रीय समितिको बैठक महामन्त्री शशांक कोईरालाको आग्रहमा स्थगित गरिएको पनि बताए । महामन्त्री कोइरालाले कोभिडको अवस्थाका कारण बैठक रोक्न आग्रह गरेपछि बैठक रोकिएको बताए ।

पत्रकार सम्मेलनमा सभापति शेरबहादुर देउवाले सांसदको संख्या नपुगेका कारण कांग्रेसको नेतृत्वमा सरकार बन्न नसकेको बताए । नेपाली कांग्रेसले आफ्नो नेतृत्वमा वैकल्पिक सरकार बनाउने निर्णय गरेको भएपनि सांसद संख्या नपुग्दा सरकार बन्न नसकेको बताएका हुन् । जसपाले साथ नदिदा कांग्रेस र माओवादी केन्द्रको संख्याले मात्रै नपुग्ने उनको भनाई छ । उनले भने– ‘नेपाली कांग्रेस पार्टीले नि कांग्रेसको नेतृत्वमा वैकल्पिक सरकार बनाउने निर्णय गरेको छ नि । तर संख्या पुग्नुपर्छ यहाँ त । संख्या नपुगिकन चाहेर हुन्छ त ? प्रधानमन्त्री हुन चाहान्छु भनेर प्रधानमन्त्री हुन्छ र ? संख्या पुगेको छैन । त्यही भएर सकिएन । हामी सँग संख्या पुग्दैन यो सत्य कुरा हो । जसपाले उता सहयोग गरेको छ ।’

यसैक्रममा सभापति देउवाले एमसीसीबारे भ्रम फैलाइएकोमा असन्तुष्टि जनाए । अमेरिकाले एमसीसी मार्फत सित्तैमा ठुलो सहयोग गरेको भएपनि अनेक किसिमका भ्रम र झुठा प्रचारहरु गरिएको बताए ।

एमसीसीमार्फत नेपालमा अमेरिकी सेना आउँछ भन्ने झुठा प्रचार गरिएको उनको भनाई छ । उनले भने ‘बाबुराम भट्टराई र सुशील कोइरालाको पालादेखि यो एमसिसी सुरू भएको हो । मेरो बेलामा मात्रै आएको होइन । मेरो बेलामा यत्ति भएको हो क्याबिनेट डिसिजन गरेर मन्त्रीजीलाई पठाएको हो ‘यो ठूलो अनुदान हो, ब्याज तिर्नु पर्ने पनि छैन। यो केबल अनुदान हो ।’