शिक्षक दरबन्दी नहुँदा पठनपाठनमा समस्या

बझाङ । बझाङको बुङ्गल नगरपालिका–११ को भूमिराज प्राथामिक विद्यालयमा शिक्षकको दरबन्दी नहुँदा पठनपाठनमा समस्या भएको छ । लामो समयदेखि निजी शिक्षकलाई अभिभावकले चन्दा सङ्कलन गरेर तलब खुवाउँदै आए पनि पछिल्लो समय पारिश्रमिक दिन नसकेपछि पठनपाठन प्रभावित हुन थालेको छ ।

विसं २०४६ मा स्थापना भएको भूमिराज प्राविमा २०७५ देखि कक्षा ८ सम्म सञ्चालन गरिए पनि निजी शिक्षकलाई पारिश्रमिक दिन नसकेपछि हाल कक्षा ५ सम्म मात्रै पढाइ हुँदै आएको छ ।

उक्त विद्यालयमा अहिले दुई दरबन्दीका र एक जना राहततर्फको मात्रै शिक्षक रहेको विद्यालयका प्रधानाध्यापक वीरबहादुर पातलीले बताए । विद्यालयमा एक जना बालकक्षा कोटा मात्र भएको भए पनि पठनपाठन गराउन सहज हुने उनको भनाइ छ ।

विद्यालयमा भवन बालमैत्री नरहेको र अहिले ५६ छात्रा ४५ छात्र गरी १ सय १ विद्यार्थी अध्यन गर्दै आएका छन् । गाउँमा पढ्ने विद्यार्थीको सङ्ख्या धेरै भए पनि डेढ घण्टा पैदल हिँडेर केदार मावि र शिव माविमा जानुपर्ने बाध्यता रहेको र गाउँमै ६ र ७ कक्षा सञ्चालन गर्न सकेको खण्डमा आफूहरुलाई सहज हुने कक्षा ५ मा अध्यनरत छात्रा रेखा पातलीले बताइन् ।

केही वर्षदेखि गाउँलेबाट चन्दा उठाएर शिक्षकलाई तलब दिँदै आएका भए पनि हाल चन्दा नउठेपछि विद्यालय सञ्चालन गर्न समस्या भएको र विद्यालयमा विद्यार्थीको पठनपाठनका लागि नगरपालिकाले पहल गर्नुपर्ने विद्यालय व्यवस्थापन समिति अध्यक्ष गगन पातलीको भनाइ छ ।

यता नगरपालिका प्रमुख धनबहादुर विष्टले भूमिराज प्राविमा मात्र नभएर नगरपालिकाका वडा नं ८, ९, १० लगायतमा रहेका प्रायः सबै विद्यालयमा शिक्षक दरबन्दी नहुँदा समस्या भएकाले त्यसतर्फ शिक्षा मन्त्रालयले ध्यान दिनुपर्ने बताए । उनका अनुसार नगरपालिकाभित्र ९१ भन्दा बढी शिक्षकको दरबन्दी रिक्त छन् ।