काठमाडौँ, १९ असोज ।नेकपा (एमाले), नेकपा (माओवादी केन्द्र) र नयाँ शक्ति नेपाल निकटका विद्यार्थी संगठनले बृहत् वाम एकता र एकीकृत पार्टी निर्माणका विषयमा भएको सहमतिको स्वागत गरेका छन् ।तीन वटै संगठनका अध्यक्षले आज संयुक्त रुपमा विज्ञप्ति प्रकाशन गरी समाजवाद स्थापना गर्ने लक्ष्यका साथ शुरु भएको वामपन्थी शक्तिको एकताले मुलुकलाई नयाँ दिशामा लैजाने बताए । एकता संयोजन समिति र चुनावी तालमेलको घोषणाले मुलुकमा नयाँ आशाको सञ्चार गरेको उल्लेख गर्दै उनीहरुले सुखी नेपाली र समृद्ध नेपाल निर्माणको यात्रालाई थप मजबुत बनाउने विश्वास पैदा गरेको बताएका छन् । विज्ञप्ति जारी गर्नेमा अनेरास्ववियुका अध्यक्ष नवीना लामा, अखिल (क्रान्तिकारी)का अध्यक्ष रञ्जीत तामाङ र नयाँ शक्ति विद्यार्थी युनियनका अध्यक्ष श्यामबाबु गौतम छन ।
