काठमाडौं । त्रिभुवन आर्मी क्लबले पहिलो संस्करणको काठमाडौं मेयर कप एकदिवसीय पुरुष क्रिकेट प्रतियोगितामा पहिलो जित हात पारेको छ ।
टियु क्रिकेट मैदानमा सोमवार भएको खेलमा काठमाडौं मेयर-११ लाई ५ विकेटले पराजित गर्दै आर्मीले पहिलो जित हात पारेको हो ।
काठमाडौंले दिएको १ सय ५६ रनको लक्ष्य आर्मीले २३ ओभर ५ बलमा ५ विकेट गुमाएर पूरा गर्यो । आर्मीको जितमा सोमपाल कामीले ८० रनको अर्धशतकीय इनिङ्स खेले । उनले ५१ बलमा ९ चौका र ६ छक्का प्रहार गरे ।
यस्तै कुशल मल्लले २३ रन जोड्दा भिम सार्कीले १६ रन बनाए ।
कप्तान विनोद भण्डारीले अविजित २० रन जोड्दा राजेश पुलामी ८ रनमा अविजित रहे । काठमाडौंका सन्दीप लामिछाने र विपिन खत्रीले २-२ विकेट लिए ।
यस अघि टस हारेर पहिले ब्याटिङ गरेको काठमाडौंले ४२ ओभर १ बलमा अलआउट हुँदै १ सय ५५ रन बनाएको थियो । काठमाडौंका लागि सौरभ खनालले सर्वाधिक ४२ रन बनाए । उनले ७४ बलमा २ चौका र २ छक्का प्रहार गरे ।
सन्दीप रजालीले ३७ रन जोड्दा खडक बोहराले १९ रन बनाए । त्यस्तै हरिशंकर साह १८ रनमा आउट हुँदा कप्तान सन्दीप लामिछाने १३ रन जोड्दा आउट भए ।
आर्मीका शाहब आलमले ३९ रन खर्चिएर ४ विकेट लिए । जितेन्द्र मुखियाले ३ विकेट तथा सोमपाल कामी, बिक्रम सोब र कुशल मल्लले १र१ विकेट लिए ।
जितसँगै आर्मीले २ खेलमा २ अंक जोडेको छ । काठमाडौंको यो पहिलो हार हो ।
काठमाडौंले २ खेलमा २ अंक जोडेको छ ।
यो खबर पढेर तपाईलाई कस्तो महसुस भयो ?
प्रतिक्रिया