ग्यारीलाई महिला फुटबल टोलीको प्रशिक्षक बनाउने एन्फाको तयारी

काठमाडौं । अखिल नेपाल फुटबल संघ (एन्फा)ले टेक्निकल डाईरेक्टर ग्यारी फिलिप्सलाई राष्ट्रिय महिला फुटबल टोलीको प्रशिक्षक बनाउने तयारी गरेको छ ।

पछिल्लो एक वर्ष एन्फा टेक्निकल डाईरेक्टरका रुपमा रहेका ग्यारीलाई एन्फाले रिक्त रहेको महिला राष्ट्रिय फुटबल टोलीको प्रशिक्षकको जिम्मेवारी दिन लागेको हो ।

गत वर्ष नेपालमै आयोजना भएको १३ औं दक्षिण एसियाली खेलकुद प्रतियोगिता (साग) लगत्तै महिला टोली प्रशिक्षक विहीन छ ।

सागमा पहिलो पटक महिला टोलीलाई स्वर्ण जिताउने लक्ष्य बनाएका मुख्य प्रशिक्षक हरि खड्काले उपाधि भिडन्तमा भारतसँग पराजित बनेपछि नैतिकताको आधारमा प्रशिक्षक पदबाट राजीनामा दिएका थिए ।

भर्खरै मात्रै राष्ट्रिय महिला लिग समाप्त गरेको एन्फाले हाल महिला टोलीलाई प्रशिक्षणमा बोलाउने तयारी गरेको छ । त्यसअघिनै रिक्त रहेको प्रशिक्षक पदमा एन्फाले अष्ट्रेलियन प्राविधिक निर्देशक ग्यारीलाई जिम्मेवारी दिन लागेको हो ।