नेपाल बैंकमा सरकारको ठाडो हस्तक्षेप : अध्यक्षले दिए राजीनामा

काठमाडौं । नेपाल बैंकका अध्यक्ष बासुदेव अधिकारीले राजिनामा दिएका छन् ।

सरकारले बैंकमाथि हस्तक्षेप गरेपछि अध्यक्ष अधिकारीले राजीनामा दिएका हुन् । नियामक निकाय नेपाल राष्ट्र बैंकले लाभांशका लागि स्वीकृत दिएपनि सरकारले घटाउन भनेपछि अनाश्यक हस्तक्षेप गरेको भन्दै अध्यक्ष अधिकारीले राजीनामा दिएका हुन् ।

अध्यक्ष अधिकारीले गत माघ ५ गते अर्थमन्त्री विष्णु पौडेललाई राजीनामा बुझाएका हुन् । बैंक सञ्चालक समितिले घोषणा गरेर नियामक निकायले स्कीकृत गरेको लाभांश सरकारले घटाउन नमिल्ने भन्दै उनले राजीनामा दिएका हुन् । सरकार लगानीकर्ता मात्रै भएकाले अनाश्यक हस्तक्षेप गर्न नहुने अध्यक्ष अधिकारीको भनाई छ ।

नेपाल बैंकले गत आर्थिक वर्षको नाफाबाट १२ प्रतिशत बोनस र ४ प्रतिशत नगद गरी १६ प्रतिशत लाभांश वितरण गर्ने निर्णय गरेको थियो । यसलाई राष्ट्र बैंकले स्वीकृती दिएर बैंकको गत पुस २९ गते बैंकको साधारणसभा समेत पारित गरिसकेको छ ।

यस्तो अवस्थामा लाभांश घटाउन सरकारको दबाब आएपछि अधिकारी राजीनामा दिन बाध्य भएका हुन् । बैंकमा सरकारको ५१ प्रतिशत र सर्वसाधारणको ४९ प्रतिशत शेयर छ ।