काठमाडौं । संसद विघटनविरुद्ध परेको रिटमाथि सर्वोच्चको संवैधानिक इजलासमा बहस जारी छ ।
आज (आइतवार) को बसहका क्रममा प्रधानन्यायाधीश चोलेन्द्र शमशेर राणाले आगामी चुनावबारे प्रश्न उठाएका छन् ।
बहसका क्रममा प्रधानन्यायाधीश राणाले अहिलेको अवस्थामा नेपालमा चुनावको वातावरण भए/नभएको प्रश्न उठाएका हुन् ।
आइतवार सरकारको तर्फबाट अधिवक्ता श्यामकुमार भट्टराईले बहस गरेका छन् । बहसका क्रममा अधिवक्ता भट्टराईले प्रधानमन्त्री केपी शर्मा ओलीले राजनीतिक शक्तिको असफलतापछि संसद विघटन गरि जनतामा जाने निर्णय गरेको जिकिर गरेका छन् ।
त्यस्तै बौद्धिक रुपमा आदर गर्न सकिने, सैद्धान्तिक रुपमा स्वीकार गर्न सकिने र व्यवहारिक खालको फैसला हुनुपर्ने उनको भनाइ छ । अधिवक्ता भट्टराईले संसद विघटन राजनीतिक विषय रहेको दाबी गर्दै त्यसैकारण प्रधानमन्त्री जनतामा जाने निर्णय गरेको जिकिर गरेका थिए । लगत्तै प्रधानन्यायाधीश राणाले अधिवक्ता भट्टराईलाई चुनावमा जाने वातावरण भए नभएको प्रश्न गरेका हुन् ।
‘चुनावको सम्भावना छ ? फ्लोरमा वातावरण हुनुपर्यो नि होइन ? अहिले जुन वातावरण छ, त्यो (चुनाव) सम्भवना छ ?’ प्रधानन्यायाधी राणाले संसद विघटनविरुद्ध सडकमा प्रदर्शन भइरहेको संकेत गर्दै त्यस्तो प्रश्न सोधे ।
त्यस्तै अधिवक्ता भट्टराईले उक्त कुराको फैसला जनताले गर्ने र देशमा चुनावको माहोल रहेको बताएका थिए ।
