काठमाडौं । इंग्लिस प्रिमियर लिग फुटबलमा म्यानचेस्टर युनाईटेडले एभर्टनसँग बराबरी खेल्दै अंक बाडेको छ । शनिवार राति भएको खेलमा युनाईटेडले एभर्टनसँग ३-३ गोलको बराबरी खेलेको हो ।
घरेलु मैदानमा २ गोलको सुरुवाती अग्रता जोगाउन नसक्दा युनाईटेड बराबरीमा रोकिएको हो ।
खेलको २४ औं मिनेटमा एडिन्सन काभानीले गोल गर्दै युनाईटेडलाई अग्रता दिलाएका थिए । खेलको ४५ औं मिनेटमा ब्रुनो फर्नान्डेसले गोल गर्दै टोलीको अग्रता २-० को बनाए ।
खेलको ४९ औं मिनेटमा अब्दुलाए डुकोरेले गोल गर्दै एभर्टनलाई २-१ को स्थितिमा ल्याए । खेलको ५२ औं मिनेटमा जेम्स रोड्रीगेजले गोल गर्दा खेल २-२ गोलको बराबरीमा पुग्यो ।
खेलको ७० औं मिनेटमा स्कट म्याकटोमेनीले गोल गर्दा युनाईटेड ३-२ ले अघि रह्यो ।
तर, खेलको इन्जुरी समयमा डोमिनिक लेविनले गोल गर्दै एभर्टनलाई ३-३ गोलको बराबरीमा ल्याएका थिए । यो बराबरीसँगै दोस्रो स्थानको युनाईटेड २३ खेलमा ४५ अंक जोडेको छ ।
बराबरीले युनाईटेड शीर्ष स्थानको म्यानचेस्टर सिरीसँग अंक बराबरी गर्न असफल भएको छ । एभर्टन ३७ अंक जोडेर लिगको छैटौं स्थानमा रहेको छ ।
- एजेन्सी
