विराटनगर । प्रदेश १ को प्रदेशसभा बैठक आज आइतवार बस्दै छ। गत माघ ७ गतेबाट शुरु भएको प्रदेशसभाको सातौ हिउँदे अधिवेशनको दोस्रो बैठक १९ दिन पछि आज बस्न लागेको हो।
नेकपा विभाजनपछिको विवादका कारण माघ ७ गते करिब ३ मिनेट बसेर स्थगित भएको बैठक आज दिउँसो २ बजे बस्न लागेको प्रदेशसभा सचिवालयले जनाएको छ ।
आजको बैठकमा मुख्यमन्त्री शेरधन राईविरुद्ध अविश्वासको प्रस्ताव टेवल हुने निश्चित प्राय: छ । अविश्वासको प्रस्तावबाहेक अन्य विजेनस नभएकाले बैठक स्थगित नभए प्रस्ताव टेवल हुने बताइएको छ । दाहाल-नेपाल समूह जसरी पनि अविश्वासको प्रस्ताव टेबल गर्नुपर्ने अडानमा छ भने ओली समूह कुनै पनि अवस्थामा टेबल हुन नदिने रणनीतिमा छ । त्यसका लागि निलम्बित १६ प्रदेशसभा सदस्यलाई बैठकमा प्रवेश गर्न नदिने अडानमा ओली समूह छ । उनीहरु बैठकमा प्रवेश गरे बैठक सञ्चालन गर्न नदिने ओली समूहको तयारी रहेको स्रोतले जनाएको छ ।
मुख्यमन्त्री राईविरुद्ध अविश्वासको प्रस्ताव दर्ता गर्ने दाहाल-नेपाल समूहका भीम आचार्य, इन्द्र आङ्बो, जीवन घिमिरेसहित १६ जना प्रदेशसभा सदस्यलाई ओली समूहले तीन महिनाका लागि निलम्बन गरेको छ ।
