१० हजार निकालेर घर बनाउन नसक्नेको घरको बीमा गर्ने वातावरण बन्नुपर्छ : अध्यक्ष सिलवाल

काठमाडौं । बीमा समितिका नव नियुक्त अध्यक्ष सूर्य प्रसाद सिलवालले आफ्नो घर बनाउन १० लाख निकाल्न नसक्नेहरुको घरसम्म बीमाको पहुँच हुनुपर्ने बताएका छन् ।

बीमा समितिमा आयोजित शुभकामना कार्यक्रममा बोल्दै नवनियुक्त अध्यक्ष सिलवालले यस्तो बताएका हुन् । ‘एउटा छुपडिमा बस्ने मानिसले घरको बीमा गर्न सक्दैन, उसले १० हजार निकालेर बीमा गर्न सक्दैन, त्यो १० हजारको जोहो गर्न सक्ने ठाउँमा हामी छौँ ।’ अध्यक्ष सिलवालले भने । उनले ग्रामिण क्षेत्रमा दुई छाक खान समस्या भएको मानिसको पहुँचमा पनि बीमा पुग्नुपर्ने बताए । बीमा क्षेत्रमा अर्बपतिलाई मात्रै होइन, झुपडीहरुमा बस्नेलाई पनि समेट्न सक्नुपर्ने बताए ।

उनले गाउँका ९५ प्रतिशत मानिसलाई बीमाका बारेमा जानकारी नभएकाले त्यस्ता स्थानमा बीमाको पहुँच पुर्‍याउन अनिवार्य भएको बताए ।

समितिको काम बीमाको पहुँच नभएको स्थानमा पुग्ने हो भन्दै त्यसका लागि के के गर्नु पर्ने हो समिति तयार रहेको बताए । उनले बीमा क्षेत्रमा समस्याको डङगुर भएपनि समाधानका लागि तयार रहेको बताए । अध्यक्ष सिलवालले बीमा क्षेत्रलाई नियन्त्रण भन्दा पनि व्यवस्था महत्वपूर्ण भएकाले व्यवस्थापनमा विशेष ध्यान दिने बताएका छन् ।

त्यस्तै, उनले कानूनको उल्लंघन गरेर अख्तियारसम्म नपुग्न सबैलाई आग्रह गरेका छन् । बीमा क्षेत्रका सबै पक्षको बारेमा आँफुलाई जानकारी नभएपनि अर्थतन्त्रका अधिकांश विषयमा आँफु जानकार रहेकाले बीमा क्षेत्रलाई राम्रोसँग अगाडी बढाउनेमा आफ्नो प्रयास रहने बताए ।

यो खबर पढेर तपाईलाई कस्तो महसुस भयो ?