काठमाडौं । संवैधानिक निकायमा भएका नियुक्तिका विरुद्ध सभामुख अग्निप्रसाद सापकोटाले नियुक्ति भएका सबैलाई विपक्षी बनाएर मुद्दा दायर गरेका छन् ।
सभामुख सापकोटाले संसदीय सुनुवाइ बिनानै अख्तियार लगायतका संवैधानिक निकायको नियुक्ति बदर गर्न माग गर्दै शुक्रवार सर्वोच्च अदालतमा रिट दायर गरेका हुन् ।
त्यस्तै राष्ट्रपति, प्रधानमन्त्री, राष्ट्रिय सभाका अध्यक्ष, प्रधानन्यायाधीश, संवैधानिक परिषद्का सचिव रहने मुख्य सचिव लगायत नियुक्ति भएका सबैलाई मुद्दामा विपक्षी बनाइएको स्रोतले जनाएको छ ।
त्यस्तै रिटको पेशी आइतवारको लागि तोकिएको बताइएको छ ।
प्रधानमन्त्री केपी शर्मा ओलीले संवैधानिक परिषद्को बैठक बोलाएर गत मंसिर ३० गते अध्यादेशमार्फत विभिन्न ११ संवैधानिक आयोगहरुमा ३२ जना नियुक्त गर्न सिफारिस गरेका थिए । उक्त बैठकमा सभामुख सापकोटा सहभागी भएका थिएनन् । त्यस्तै गत आइतवार सभामुख सापकोटाले उक्त सिफारिस असंवैधानिक रहेको भन्दै फिर्ता पठाइदिएका थिए ।
यसअघि नै संवैधानिक आयोगहरुमा गरिएको नियुक्ति असंवैधानिक रहेको भन्दै वरिष्ठ अधिवक्ता दिनेश त्रिपाठीले सर्वोच्च अदालतमा रिट दायर गरेका थिए ।
यद्यपी बुधवार राष्ट्रपति भवन शीतलनिवासमा नियुक्त ३२ पदाधिकारी तथा सदस्यहरुले राष्ट्रपति समक्ष पद तथा गोपनियताको सपथ लिइसकेका छन् ।
