काठमाडौं । आज (बिहिवार) नेपाल कम्युनिष्ट पार्टी (नेकपा) प्रचण्ड-नेपाल पक्षले देशभर आमहड्ताल गरेको छ ।
संविधानको बेवास्ता गर्दै संवैधानिक आयोगहरूमा नियुक्ति गरेको भन्दै रुष्ट बनेको प्रचण्ड-नेपाल पक्षले बुधवार पत्रकार सम्मेलन गर्दै आमहड्ताल गर्ने घोषणा गरेको अनुरुप आज बिहानै देखि काठमाडौं लगायत देशका विभिन्न स्थानहरुमा आमहड्तालको प्रभाव देखिएको छ ।
आमहड्तालमा उत्रिएका प्रचण्ड-नेपाल पक्षका कार्यकर्ताले राजधानीमा केही सवारी साधनमा तोडफोड गरेका छन् भने काठमाडौंस्थित गोंगबुमा ट्याक्सीमा आगजनी समेत गरेका छन् । त्यस्तै, विभिन्न स्थानमा प्रहरी र कार्यकर्ताबीच धरपकड भइरहेको छ ।
यसैबीच सामाजिक सञ्जाल फेसबुक ग्रुप ‘एमआरआर’का सदस्यहरु जारी आमहड्तालको विरोधमा ‘नेपाल खुल्ला छ’, ‘नेपाल बन्द छैन’ भन्ने प्लेकार्ड बोकेर काठमाठौंको बल्खुमा जम्मा भएका छन् । बल्खुबाट शुरु भइ चक्रपथ परिक्रमा गरी शान्तिपूर्ण प्रदर्शन गर्ने उनीहरुको योजना थियो ।
योजनाअनुरुप बिहान करिब ५० जनाको संख्यामा उनीहरु बल्खुमा भेला पनि भए । उनीहरुले आमहड्तालविरुद्धको शान्तिपूण विरोध गर्न लागेको भनेर प्रहरीलाई समेत पूर्व जानकारी गराइ सकेका थिए ।
आमहड्तालविरुद्धको प्रदर्शनमा सहभागी एमआरआरका एक सदस्यका अनुसार प्रहरीले ‘तपाईहरुलाई हामी स्कटिङको व्यवस्था मिलाइ दिन्छौं’ समेत भनेका थिए । ‘तर पछि सशस्त्र प्रहरी बलसहितको टोली आएर हाम्रो बाइकको चाबी थुत्नुभयो,’ प्रदर्शनमा सहभागि उनले लोकपथसँग भने ।
‘चाबी दिनु हुन्छ भनेर हामी कुरेर बस्यौँ तर हामीलाई मोटरसाइकलबाट पम्प्लेट झिक्न भनियो , हामीले मानेनौं,’ अगाडि नै जानकारी गराउँदा र प्रहरीको तर्फबाट सुरक्षा दिइने भनिएतापति त्यसो नभएको गुनासो गर्दै उनले सुनाए, ‘सुरक्षा दिन नसक्ने बाहाना गर्नुभयो त्यसपछि हामी चुपचाप फर्कियौं ।’
‘आमहड्तालविरुद्ध आवाज उठाउँदा प्रहरी दमन भयो । ‘प्रहरी हाम्रो साथी’ भन्ने भनाइ त पोस्टरमा मात्रै सीमित रहेछ,’ उनले लोकपथसँगको कुराकानीका क्रममा आक्रोश पोखे ।
के भन्छ प्रहरी ?
प्रदर्शनमा सहभागी एमआरआरका सदस्यका गुनासोपछि लोकपथले प्रहरीको ‘भर्सन’ बुझ्न महानगरीय प्रहरी वृत्त कालीमाटिका डीएसपी कपिल राज बोहोरासँग सम्पर्क गर्यो । घटनाबारे बुझन खोज्दा उनले प्रहरी दमन नभएको भन्दै फोन राखिदिए ।
सुरक्षा चुनौतीका कारण उनीहरुलाई प्रदर्शन गर्न नदिएको डीएसपी बोहोराको भनाई छ।
यो खबर पढेर तपाईलाई कस्तो महसुस भयो ?
प्रतिक्रिया