कोरोना अपडेट: एक जनाको मृत्यु, १७१ जना संक्रमित

काठमाडौँ– देशभर पछिल्लो २४ घण्टामा थप १७१ जनामा कोभिड–१९ को सङ्क्रमण पुष्टि भएको छ । स्वास्थ्य तथा जनसङ्ख्या मन्त्रालयका अनुसार पछिल्लो समय दुई हजार ९४६ को स्वास्थ्य परीक्षण गर्दा ७१ महिला र १०० पुरुष गरी सो सङ्ख्यामा सङ्क्रमण पुष्टि भएको हो ।

योसँगै हालसम्म नेपालमा कोरोना भाइरस सङ्क्रमितको सङ्ख्या दुई लाख ७१ हजार २ सय ८९ पुगेको छ । पछिल्लो २४ घण्टामा थप २५९ जना उपचारपछि निको भएका छन् । योसँगै निको हुनेको सङ्ख्या दुई लाख ६६ हजार ८५९ पुगेको छ । अहिले देशभर दुई हजार ४०० सक्रिय सङ्क्रमित छन् । उनीहरुमध्ये ९८ जना क्वारेन्टिनमा रहेका छन् ।

त्यसैगरी दुई हजार ४०० आइसोलेसनमा, ६८ जनाको आइसियु र १६ जनाको भेन्टिलेटरमा उपचार भइरहेको छ । हालसम्म नेपालमा २० लाख ७८ हजार ९८ जनाको पिसिआर परीक्षण भएको छ ।

नेपालमा कोरोना सङ्क्रमणबाट मृत्यु हुनेको सङ्ख्या दुई हजार ३० पुगेको छ भने पछिल्लो २४ घण्टामा थप एकले ज्यान गुमाएका मन्त्रालयले जनाएको छ ।