पहिरोपीडितको आवास पुनर्निर्माणका लागि सहयोग

म्याग्दी । छ महिनाअघिको पहिरोले घरवास गुमाएका म्याग्दीको धवलागिरि गाउँपालिका–६ मराङका पहिरोपीडितको आवास पुनर्निर्माणका लागि मङ्गलबार साढे १६ लाखभन्दा बढी सहयोग प्राप्त भएको छ । मराङ–काठमाडौँ समाजद्वारा सङ्कलित १६ लाख ४८ हजार वडाध्यक्ष राजाराम सुवेदीलाई समाजका अध्यक्ष धनबहादुर गुरुङ र याम गर्बुजाले हस्तान्तरण गरेका हुन्। गत असार महिनाको पहिरोबाट घरबास गुमाएकाको पुनःबास, क्षतिग्रस्त भौतिक संरचनाको पुनर्निर्माणका लागि वडा कार्यालयले स्थापना गरेको कोषमा काठमाडौँमा बस्दै आएका मराङ जन्मथलो भएकाहरुले सहयोग जुटाएका थिए ।

वडाध्यक्ष सुवेदीले सहयोगदातालाई धन्यवाद दिँदै प्राप्त रकम आवश्यकतानुसार पहिरोपीडितको पुनःबास, पुनर्निर्माणमा परिचालन गरिने बताए । मराङको राम्चे, रिखा, कल्लेनी, ठूलोगाउँ र कुम्रिमा पहिरोका कारण १९ को मृत्यु र दुई जना बेपत्ता भएका थिए । २३ घर पहिरोमा पुरिएका र बगेका थिए । कुम्रिस्थित वडा कार्यालय रहेको सामुदायिक भवन पनि पहिरोले बगाएको थियो ।

घरबास गुमाएकाहरुको पुनःस्थापनाका लागि वडा कार्यालयले स्थापना गरेको विपद् व्यवस्थापन कोषमा सङ्कलित रकमबाट २८ रोपनी छ आना जग्गा खरिद गरिएको छ । आरबाङको अस्कारेमा १२ रोपनी र राम्चेमा १७ रोपनी जग्गा खरिद गरिएको छ । जग्गा खरिदमा ५० लाख ५० हजार खर्च भएको छ । खरिद गरिएको जग्गामा सडक पुर्याएर सम्याउने तयारी भएको छ । म्याग्दी प्रवासी नेपाली सङ्घ ९मोना०ले मराङमा १० घर निर्माण गर्ने जनाएको छ । तीन कोठा र एक शौचालयसहितको घर निर्माणमा रु पाँच लाख खर्च हुने लागत अनुमान तयार पारिएको छ ।

बाँकी घर निर्माणका लागि पनि स्रोतको खोजी गरिएको छ । धवलागिरि गाउँपालिकाले विशेष गाउँसभाबाट पहिरोपीडितको निजी आवास पुनर्निर्माणका लागि ४८ लाख विनियोजन गरेको छ । धवलागिरिको धारापानी, ताकम, आटेबिर र काफलडाडाँमा पनि पहिरोले क्षति पुर्याएको थियो । गाउँपालिकाले विनियोजन गरेको बजेट कसरी परिचालन गर्ने भन्ने टुङ्गो लागिसकेको छैन । सङ्घीय सरकारले पहिरोपीडितको घर बनाउन हिमाली जिल्लाका लागि पाँच लाखका दरले अनुदान उपलब्ध गराउने कार्यविधि पारित गरेको विघटित प्रतिनिधिसभाका सदस्य भूपेन्द्रबहादुर थापाले बताए ।