‘ओली कमरेड होइन, तानाशाही हो’- अष्टलक्ष्मी शाक्य

काठमाडौं– नेपाल कम्युनिष्ट पार्टी नेकपा प्रचण्ड–माधव नेपाल समुहकी नेतृ अष्टलक्ष्मी शाक्यले प्रधानमन्त्री केपी शर्मा ओली कम्युनिष्ट आन्दोलनलाई समाप्त पार्ने दिशामा अघि बढेको आरोप लगाएकी छन्।

बुधबार नेपाल कम्युनिष्ट पार्टीका प्रचण्ड–माधव समुहको काठमाण्डौ भेलालाई सम्बोधन गर्दै बागमति प्रदेश इन्चार्ज शाक्यले प्रधानमन्त्री ओलीले कम्युनिष्ट मुल्य मान्यता विपरित प्रतिगमन गरेको दाबी गरेकी हुन् । उनले प्रधानमन्त्री ओलीप्रतिगमनकारी, तनाशाही र स्वेच्छाचारी भएको आरोप लगाइन् ।

उनले भने, “केपी ओली कमरेड होइन प्रतिगमनकारी हो । तानाशाही हो । स्वेच्छाचारी हो । उहाँले संविधानमाथि धावा बोल्नुभयो । गणतन्त्रमाथि धावा बोल्नुभयो । उहाँले संघीय लोकतान्त्रिक गणतन्त्रको चिरहरण गर्नुभएको छ । उहाँ तानाशाही नेता हो । प्रतिगमनकारी नेता हो ।”

उनले केन्द्रीय कमिटीमा आफुहरुसंग बहुमत रहेको दाबी गरिन्  । उनले भने “१४ बर्ष जेल बसेको रे ? तर केपी ओलीमा कम्युनिष्ट चरित्र विरोधी रुपको झल्को दिईरहेको छ । केपी ओलीमा कम्युनिष्ट सोच छैन । आदर्श छैन । मुल्यमान्यता छैन । त्यसैले प्रतिगमनले घुँडा टेक्नुपर्छ । केपी ओली तानाशाहाले घुँडा टेक्नुपर्छ । काठमाण्डौ तात्दै तात्दैन तर तातेपछि सेलाउदैन । कुनै पनि आन्दोलनलाई निष्कर्षमा पुर्याउनका लागि काठमाण्डौको योगदान रहदै आएको छ । यो वृहत भेलाले काठमाण्डौ तातिसकेको मैले महसुस गरेको छु ।अहिले काठमाण्डौ सिंगै आन्दोलनको केन्द्रविन्दु भएको छ । काठमाण्डौबासी तातिसकेकाले प्रतिगमन र तानाशाही केपी ओली विरुद्धको आन्दोलन निर्णायकमा पुग्न समय लाग्दैन । उहाँ अब कुर्सीबाट झर्नै पर्छ । फेरि पनि सडकमा धक्का दिनुपर्ने स्थिति आएको छ ।”
काठमाण्डौवासीहरु निरंकुशतन्त्र, एकात्मक व्यवस्था र राजतन्त्र व्यवस्थामा विश्वास नगर्ने र लोकतन्त्र र गणतन्त्र मन पराउने भन्दै काठमाण्डौ बासीहरु प्रतिगमन नसच्चीएसम्म सेलाएर नबस्ने चेतावनी दिइन्।