१०५ वर्षको उमेरमा नागरिकता पाएपछि खुशी

काठमाडौँ- दोलखाको मेलुङ गाउँपालिका–३ निवासी दुर्गामाया कार्कीले १०५ वर्षमा आज नागरिकता पाएकी छिन ।

दोलखाको साविक मालु गाविस वडा नं ४ मा विसं १९७२ भदौ १८ गते जन्मिएकी कार्कीले आज जिल्ला प्रशासन कार्यालय दोलखाबाट नागरिकता लिएकी हुन्  ।  कार्की ७७ वर्षअघि विवाह गरी घ्याङ्सुकाठोकर पुगेकी  र विवाहपश्चात श्रीमान्सँग सम्बन्ध राम्रो नभएपश्चात छोरीसँग बस्दै आएकी थिइन् ।

हाल छोरीको घरमा बस्दै आएकी कार्कीको श्रीमानको मृत्यु भइसकेको छ । १०५ वर्ष हुँदासम्म नागरिकता नभएपछि जेठाजुका छोरा गोकुलबहादुर कार्की र नाति दीपेन्द्रकुमार कार्कीको सनाखतमा जिल्ला प्रहरी कार्यालय, वडा कार्यालयको सिफारिसमा नागरिकता प्रदान गरिएको हो ।

प्रमुख जिल्ला अधिकारी रमेश शिवाकोटीले कार्कीलाई नागरिकता प्रदान गरेका थिए । एक सय पाँच वर्षको ज्येष्ठ नागरिककै नागरिकता नभएको र राज्यबाट प्रदान गरिने सेवा सुविधा पाउनबाट बञ्चित रहेको जानकारी भएपछि वडाले आफन्तसँग जाँचबुझ गरी स्थानीयवासीको रोहवरमा वडा कार्यालयको सिफारिसमा आज जिल्ला प्रशासन कार्यालयमा उपस्थित गराई नागरिकता प्रदान गरेको वडाध्यक्ष हीरा थोकरले जानकारी दिए ।

आफूले १०५ वर्षको उमेरमा नागरिकता पाएकामा खुशी व्यक्त गर्दै कार्कीले ज्येष्ठ नागरिकका लागि सरकारले प्रदान गर्ने सेवा सुविधा पनि सहजरूपमा पाउने अपेक्षा राखिन् । कार्की जिल्ला प्रशासन कार्यालय दोलखाबाट बढी उमेरमा नागरिकता लिने पहिलो ज्येष्ठ नागरिक भएको जिल्ला प्रशासन कार्यालय दोलखाका सहायक प्रमुख जिल्ला अधिकारी औलखबहादुर आलेले बताए ।