२०७७, २१ पुष मंगलवार ०६:५९

कामदारका नाममा नक्कली फर्म, ६५ करोडको भ्याट छली


प्रकाशित मिति : २०७७, २१ पुष मंगलवार ०६:५९

सर्लाही । राजश्व अनुसन्धान विभागले कमजोर आर्थिक अवस्था भएका श्रमिक तथा मजदूरका नाममा नक्कली व्यावसायिक फर्म दर्ता गरी मूल्य अभिवृद्धि कर छली गरेको अभियोगमा सर्लाही धनकौल गाउँपालिका–६ का प्रदीप साहविरुद्ध मुद्दा दायर गरेको छ।

विभागले मुख्य कारोबारी भनिएका साहसहित १० जनाविरुद्ध ६५ करोड २८ लाख ५२ हजार ३८२ रुपैयाँ बराबरको बिगो, जरिवाना र कैद सजायको माग गर्दै सोमबार उच्च अदालतमा मुद्दा दायर गरेको हो।

आरकेएम ट्रेडिङलगायत १३ नक्कली फर्म कमजोर आर्थिक अवस्था भएका मजदूर तथा कामदारका नाममा दर्ता गरी सबै फर्मको बैंक खातासमेत सञ्चालन गरेको अनुसन्धानबाट पाइएको विभागले जनाएको छ। उनीहरुले नक्कली बिक्री बिजक जारी गर्दै आर्थिक वर्ष २०७३/७४ देखि आव २०७५/७६ सम्म मूल्य अभिवृद्धि कर र आयकर राजश्व चुहावट गरेको पाइएको छ।

भ्याटतर्फ २२ करोड ४९ लाख ६९ हजार ८०१ रुपैयाँ र आयकरतर्फ ३७ करोड ५८ लाख ३६ हजार ८८९ रुपैयाँ र लाभांश पाँच करोड २० लाख ४५ हजार ६९२ रुपैयाँ बराबरको चुहावट गरेको पाइएको छ। विभागले बिगोबमोजिमको रकम असुलउपर गरी जरिवाना र कैद सजायको माग गरेको छ।

प्रतिक्रिया दिनुहोस