काठमाडौं, १६ असोज—सप्तरीका चर्चित देवनारायण यादवलाई भारतीय प्रहरीले पक्राउ गरेको छ । सप्तरीको तिलाठी कोइलाडी गाउँपालिकाका यादवलाई भारतीय प्रहरीले पक्राउ गरेको हो । सप्तरी सीमा पारीको कुनौलीबाट आफ्ना छोरा अजयलाई भारतीय प्रहरीले पक्राउ गरेपछि सोही विषयमा बुझ्न गएका उनलाई पनि पक्राउ गरिएको बताइएको छ । भागी विवाह गरी अजयले भारतीय चेली नेपाल ल्याएको र सोहि प्रकरणमा बाबुछोरालाई पक्राउ गरिएको बताइएको छ । बाबुछोरा दुवैलाई भारतका विहार राज्यको सुपौल जिल्लास्थित विरपुर जेल चलान गरिएको बताइएको छ । सप्तरीका एसपी मुकेश सिंहले भने बुझ्ने प्रयास भइरहेको प्रतिक्रिया दिए । सप्तरीको तिलाठास्थित दशगजा क्षेत्रमा भारतीयले दादागिरी शैलीमा बाँध बनाउन लागेपछि गत वर्ष उनको नेतृत्वमा सीमा रक्षार्थ जुट्दा यादव घाइते भएका थिए । त्यतिबेला उनको टाउकोमा गम्भीर चोट लागेको थियो भने उनले सीमा रक्षार्थ मर्न पनि तयार रहेको बताएपछि राष्ट्रवादी नेपाली भन्दै उनको निकै प्रशंशा समेत भएको थियो ।
