एक महिने शिशु र आमा मृत अवस्थामा फेला, श्रीमान् अचेत

काठमाडौं । काठमाडौंको बौद्धमा एक महिला र उनकी एक महिनाको छोरी मृत अवस्थामा फेला परेका छन् ।

गोकर्णेश्वर नगरपालिका–२ नयाँपाटी बस्दै आएकी २७ बर्षीया पेम्बी शेर्पा र उनकी एक महिनाको छोरी मृत फेला परेका हुन् ।  सोही कोठामा ३२ बर्षका श्रीमान् दोर्जे शेर्पा अचेत अवस्थामा फेला परेका  छन् ।

महानगरीय प्रहरी वृत्त बौद्धका डीएसपी नवीन कार्कीले लोकपथलाई दिएको जानकारी अनुसार अचेत अवस्थामा फेला परेका दोर्जे शेर्पाको नेपाल मेडिकल कलेजमा उपचारपछि होस आएको छ ।

कोठामा राती सुत्दा क्वाइलवाला हिटर र इलेक्ट्रिकल हिटर बालेर सुतेको र झ्याल ढोका सबै बन्द गरेका कारण निस्सासिएर उनीहरुको मृत्यु भएको हुनसक्ने प्रहरीको प्रारम्भिक अनुसन्धानले बताएको छ ।

उनीहरुले बस्दै आएको घरमा किराना पसल सञ्चालन राखेका थिए । बिहान घरबेटी सामान लिन जादा समेत अबेरसम्म नउठेपछि बोलाउदा नबोलेपछि प्रहरीलाई खबर गरेका थिए ।