मोइस केनको गोलमा पीएसजी विजयी

काठमाडौं । च्याम्पियन्स लिग फुटबलमा पेरिस सेन्ट जर्मेन (पीएसजी) ले जित हात पारेको छ । बुधवार राति भएको समूह एचको खेलमा पीएसजीले टर्कीस क्लब इस्तानबुल बासाकेशिरलाई २–० ले पराजित गरेको हो ।

ब्राजिली स्टार नेयमारले उक्त खेलमा चोट बोकेका थिए । खेलको सुरुवातमै मांशपेशीमा चोट बोक्दै नेयमार मैदानबाट बाहिरीएका थिए । पीएसजीको जितमा यसै सिजन एभर्टनबाट लोनमा आएका मोइस केनले दुई गोल गरे ।

खेलको ६४ औं मिनेटमा मोइस केनले पहिलो गोल गरेका थिए । त्यस्तै खेलको ७९ औं मिनेटमा दोस्रो गोल गरेका थिए । च्याम्पियनस लिगको पहिलो खेलमा म्यान्चेष्टर युनाईटेडसँग हार ब्यहोरेको पीएसजीले पहिलो जित हात पारेको हो ।

पीएसजीले समूहमा तीन अंक जोडेको छ । टर्कीस क्लब अंक विहिन हुँदै पुछारमा छ ।

• एजेन्सी