काठमाडौं । बितेको २४ घण्टामा नेपालमा थप ३ हजार ५५६ जनामा कोरोना भाइरस (कोभिड-१९) संक्रमण पुष्टि भएको छ ।
स्वास्थ्य तथा जनसंख्या मन्त्रालयले दिएको जानकारी अनुसार बितेको २४ घण्टामा देशका विभिन्न स्थानमा रहेका प्रयोगशालामा गरिएका १५ हजार ५७७ नमूनाको आरटी पिसिआर परिक्षणका क्रममा थप ३ हजार ५५६ जनामा कोरोना संक्रमण पुष्टि भएको हो ।
काठमाडौंमा १ हजार ७४६, ललितपुरमा २१६ र भक्तपुरमा १६७ जनासहित काठमाडौं उपत्यकामा मात्रै २ हजार १२९ जनामा कोरोना संक्रमण पुष्टि भएको छ । योसँगै नेपालमा कोरोना संक्रमितको कुल संख्या १ लाख १५ हजार ३५८ पुगेको छ ।
प्रवक्ता गौतमका अनुसार नेपालका ११ जिल्लामा ५०० भन्दा बढी कोरोना संक्रमित रहेका छन् ।
५ सय भन्दा बढी उपचाररत कोरोना संक्रमित भएका ११ जिल्ला
- काठमाडौं
- ललितपुर
- भक्तपुर
- मोरङ
- रुपन्देही
- सुनसरी
- चितवन
- सुर्खेत
- मकवानपुर
- बाँके
- दाङ
नेपालमा बितेको २४ घण्टामा थप १ हजार ५०३ जना संक्रमणमुक्त भएका छन् । योसँगै संक्रमणमुक्त हुनेको संख्या ७८ हजार ७८० पुगेको छ । यो कुल संक्रमितको ६८.३ प्रतिशत हो ।
यसैबीच हालको अवस्थामा उपचाररत संक्रमितको संख्या ३५ हजार ९१५ रहेको मन्त्रालयले जनाएको छ । तिमध्ये होम आईसोलेसनमा २० हजार ८६७ जना र संस्थागत आईसोलेसनमा १५ हजार ४८ जना छन् । तिमध्ये ३०७ जना संक्रमितको आईसियु र ६६ जनाको भेन्टिलेटरमा उपचार भइरहेको छ ।
हाल देशका विभिन्न स्थानमा रहेका क्वारेन्टाईनमा ४ हजार ७९५ जना रहेका छन् ।
डाक्टर गौतमका अनुसार ७७ जिल्ला मध्ये मनाङमा मात्र हालको अवस्थामा संक्रमित छैनन् । नेपाल कोरोनाको कारण खराब भएको विश्वहरुको सूचीमा टप ५० भित्र रहेको छ ।
कोरोना भाईरस संक्रमणका कारण नेपालमा हालसम्म ६६३ जनाको मृत्यु भएको छ । स्वास्थ्य मन्त्रालयले स्थिती अझ भयावह बन्दै गएको भन्दै थप सचेतना अपनाउन अनुरोध गरेको छ ।
हिजो ( सोमवार) नेपालमा ४ हजार ४७ जनामा संक्रमण पुष्टि भएको थियो । १ हजार ४७३ जना संक्रमणमुक्त भएका थिए भने ९ जनाको मृत्यु भएको थियो ।
यो खबर पढेर तपाईलाई कस्तो महसुस भयो ?
प्रतिक्रिया