आइतवार र सोमवार साँझ पशुपति क्षेत्रभित्र आधा घण्टा ‘ब्ल्याक आउट’

काठमाडौं । पशुपति क्षेत्रमा आइतवार र सोमवार साँझ आधा घण्टा बत्ती निभाउने (ब्ल्याक आउट) कार्यक्रमको घोषणा गरिएको छ ।

पशुपति क्षेत्र संयुक्त सङ्घर्ष समितिले हप्ताको दुई दिन (आइतवार र सोमवार) साँझ ७ देखि साँढे ७ बजेसम्मका लागि बत्ती निभाउनको लागि ‘ब्ल्याक आउट’ कार्यक्रमको घोषणा गरेको हो ।

हालै प्रस्ताव गरिएको गुरुयोजनाको विरोधमा सो कार्यक्रम आयोजना गरिएको संयुक्त सङ्घर्ष समितिले जनाएको छ ।

केही समय अघि पशुपति क्षेत्र विकास कोषले पशुपति क्षेत्रमा पुनर्निमाणको लागि गुरु योजना सार्वजनिक गरेको थियो । त्यहाँका स्थानीयसँग कुनै छलफल नै नगरीकन गुरुयोजना सार्वजनिक गरेको भन्दै समितिले विरोध कार्यक्रमको घोषणा गरेको हो ।

साथै उनीहरुले कोषका सदस्य–सचिवलगायत कर्मचारीको राजिनामा समेत माग गरेका छन् ।