दशैंको मुखैमा यात्रु बस दुर्घटना, एकको मुत्यु, घाईतेको उपचार हुँदै

धुलिखेल, १० असोज ।काभ्रेपलाञ्चोकको रोशी गाउँपालिका–३ शिखर आम्बोटेमा आज साँझ यात्रु बस दुर्घटना हुँदा एक जनाको मृत्यु भएको छ ।बनेपाबाट साझाकोटतर्फ जाँदै गरेको बा ३ ख ३२१५ नं को बस दुर्घटनामा परी बसका सहयोगी नमोबुद्ध नगरपालिका–९ दाप्चा बस्ने २० वर्षीय रेवन लामाको मृत्यु भएको जिल्ला प्रहरी कार्यालयका प्रहरी निरीक्षक रवीराज थपलियाले जानकारी दिए ।दुर्घटनामा परी घाइते भएका बसका चालक महाभारत गाउँपालिका बूढाखानीका ३६ वर्षीय मानबहादुर लामालाई उपचारका लागि धुलिखेल ल्याइँदै गरेको प्रहरीले जनाएको छ । बसका सहचालक फरार रहेकोले खोजी भइरहेको प्रहरी निरीक्षक थपलियाले जानकारी दिए । सो बसमा तीन जना मात्र सवार रहेको प्रहरीले जनाएको छ ।यसैबीच, आजै बिहान सोही वडाको निङ्गाले भन्ने स्थानमा बोलेरो दुर्घटना हुँदा सात जनाको मृत्यु हुनका साथै ११ जना घाइते भएका थिए ।