धितोपत्र बजार नेप्सेमा सामान्य वृद्धि

काठमाडौं । धितोपत्र बजारमा शेयर कारोवार मापक नेप्से परिसूचक आज ५.०४ अङ्कले उकालो लागेर एक हजार ३४७.४४ मा पुगेको छ । यस्तै सेन्सेटिभ परिसूचक १.९५ ले वृद्धि भई २४८.१८ मा पुगेको छ । नेपाल स्टक एक्सचेन्जका अनुसार कुल १८६ कम्पनीका २५ लाख ६८ हजार १२४ कित्ता शेयर ९९ करोड ४५ लाख ४५ हजार १०९ रुपैयाँमा खरिदबिक्री भए । कारोवार भएका कूल १२ मध्ये आज पाँच उपसमूहको शेयरमा वृद्धि भएको छ भने सात उपसमूहको शेयर ओलारो लागेको छ ।

बैंकिङ ४.०९, होटल ५५.२९, जलविद्युत् २.९५, लघुवित्त ६४.९४ र सामूहिक लगानी कोष ०.१२ ले वृद्धि भएको छ । यस्तै व्यापार १४.५७, विकास बैंक १.६९, वित्त ४.७५, निर्जीवन बीमा ६.४१, उत्पादन २३.९७, अन्य २ र जीवन बीमा १९.४३ ले घटेको छ ।

कारोवारका आधारमा पुनर्बीमा कम्पनी शीर्ष स्थानमा रह्यो । सो कम्पनीको शेयर ११ करोड १० लाख १२ हजार २४३ रुपैयाँ बराबरको कारोवार भयो । यस्तै एनएमबी बैंक छ करोड ८६ लाख ८८ हजार १७६ रुपैयाँ, नेपाल लाइफ इन्स्योरेन्स पाँच करोड एक लाख ६३ हजार ५३४ रुपैयाँ, एनआइसी एशिया चार करोड ७६ लाख ४२ हजार ४०६ रुपैयाँ, छिमेक लघुवित्त विकास बैंक चार करोड ११ लाख ८८९ रुपैयाँ, साना किसान विकास बैंक तीन करोड ९९ लाख ८० हजार ६४७, हिमालयन डिष्टिलरी तीन करोड ६५ लाख ८२ हजार ६१६ रुपैयाँ र नविल बैंकको शेयर दुई करोढ २३ लाख ५९ हजार ३३० रुपैयाँमा कारोवार भयो ।

आज सबैभन्दा बढी एनआइसी एसिया ब्यालेन्स फण्ड र एनआइसी एसिया लघुवित्त वित्तीय संस्थाको शेयरधनीले सामान १०÷१० प्रतिशतले कमाए । यस्तै नवीन व्यालेन्स फण्ड–२ ९।९९, नेपाल सेवा लघुवित्त ९.९७, घोडाघोडी लघुवित्त ९.९५, गुराँस लघुवित्त ९.९०, महिला सहयात्रा माइक्रोफाइनान्स ९.८० र नविल इक्विटी फण्डका लगानीकर्ताले ९.०३ प्रतिशतले कमाए ।

यस्तै समृद्धि फाइनान्स कम्पनी ६.६७, राधी विद्युत् कम्पनी ५.०३, युनाइटेड फाइनान्स ४.०७, मल्टीप्रपोज फाइनान्स ३.६७, विसाल बजार कम्पनी ३.६६, हिमालयन पावर पार्टनर ३.६२, माउन्टेन हाइड्रो ३.६१ र सप्तकोशी डेभलपमेन्ट बैंकका लगानीकर्ताले ३.०२ प्रतिशतले गुमाए ।

सुनको प्रतितोला १०० ले घट्यो

नेपाली बजारमा आज छापावाला सुनको मूल्य प्रतितोला १०० रुपैयाँले घटेको छ । त्यस्तै तेजाबी सुनको मूल्य पनि प्रतितोला १०५ रुपैयाँले घटेको छ । नेपाल सुन चाँदी व्यवसायी महासङ्घले आजका लागि छापावाला सुनको मूल्य प्रतितोला ९२ हजार २०० रुपैयाँ र तेजाबी सुनको मूल्य प्रतितोला ९१ हजार ७६० रुपैयाँ तोकेको छ । यस्तै चाँदीको मूल्य प्रतितोला ९९५ रुपैयाँ निर्धारण गरिएको महासङ्घले जनाएको छ । रासस