लकडाउनको अवधिभर बैंकको व्याजदरमा शतप्रतिशत छुट दिन व्यवसायीको माग

काठमाडौं । व्यवसायीहरुले लकडाउनको अवधिभरको बैंकको व्याजदर शतप्रतिशत छुट दिन माग गरेका छन् ।

शुक्रबार प्रेस विज्ञप्ति जारी गर्दै नेपाल राष्ट्रिय व्यवसायी महासङ्घले कोरोना भाइरस (कोभिड १९) को कारण व्यापार व्यवसाय धराशायी बन्दै गएको भन्दै सरकारले सहुलियतस्वरुप व्यवसायीलाई बन्दाबन्दी अवधिभर बैंकको ब्याजदरमा शतप्रतिशत छुट दिन माग गरेका हुन् ।

महासङ्घले पुनःकर्जा कोषमा साना उद्योगी व्यवसायीको पहुँच सुनिश्चितता गर्न मागसमेत गरेको छ । विसं २०७३ मा स्थापना भएको महासङ्घमा विभिन्न २० सङ्घ आबद्ध छन् भने झण्डै २५ हजार व्यवसायी आबद्ध रहेका छन् ।

महासङ्घका अध्यक्ष नरेश कटुवालले बैंक तथा वित्तीय संस्थाको किस्ता तथा ब्याज तिर्ने भाका कम्तीमा एक वर्ष पछाडि सार्न माग गरेका छन् । उनले भने, “बन्दाबन्दी अवधिभर व्यावसायिक घरभाडामा पूरै छुट दिनुपर्छ” ।

यो खबर पढेर तपाईलाई कस्तो महसुस भयो ?