काठमाडौं, ६ असोज- मोहन वैद्य नेतृत्वको नेकपा (क्रान्तिकारी माओवादी) प्रदेश र प्रतिनिधिसभा निर्वाचनमा सहभागी हुने भएको छ । क्रान्तिकारी माओवादीको बिहीबार सम्पन्न केन्द्रीय सचिवालयको बैठकले प्रदेश र प्रतिनिधिसभाको निर्वाचनमा सहभागी हुने निर्णय गरेको हो, राजधानी दैनिकमा खबर छ ।यसअघि दोस्रो संविधानसभा निर्वाचन बहिष्कार गरेको उक्त पार्टीले स्थानीय तह निर्वाचनमा भने ‘उपयोग गर्ने’ रणनीतिअनुसार सहभागी भएको थियो । संविधानसभा बहिष्कार गरी संविधानप्रति असहमति जनाउँदै आएको वैद्य नेतृत्वको माओवादीले निर्वाचनमा सहभागी हुने निर्णय गर्दै ‘मुठी’ चिह्न लिएर निर्वाचनमा जाने भएको हो ।२०७० सालमा सम्पन्न दोस्रो संविधानसभा निर्वाचनलाई बहिष्कार गरेको तत्कालीन नेकपा–माओवादीको गत वर्ष सम्पन्न केही समितिको बैठकले स्थानीय तहको निर्वाचनलाई क्रान्तिकारी उपयोग गर्ने निर्णय गरेको थियो । सोहीअनुरूप क्रान्तिकारी माओवादीले पार्टीका वरिष्ठ नेता सीपी गजुरेलको अध्यक्षतामा चुनावी मोर्चा बनाएको हो ।पार्टी कार्यालय बुद्धनगरमा दुई दिनसम्म चलेको केन्द्रीय सचिवालय बैठकले प्रदेश तथा प्रतिनिधिसभामा मोर्चा सहभागी हुने निर्णय गरेको पार्टीको चुनावी मोर्चा देशभक्त जनगणतान्त्रिक मोर्चा (देजमो) का अध्यक्ष गजुरेलले जानकारी दिए ।
