५ दिनभित्र कर तिर्न सरकारले गरेको ताकेताप्रति गगन थापाको आपत्ती

लोकपथ संवाददाता

२०७७,जेष्ठ,२०,मंगलवार २०:२४

काठमाडौं । पूर्वमन्त्री एवम् नेपाली कांग्रेसका सांसद गगन थापाले सरकारले ५ दिनभित्र कर तिर्नु भनि दिएको निर्देशनमा असन्तुष्टि जनाएका छन् । मंगलवार एक सूचना जारी गर्दै आन्तरिक राजस्व बिभागले जेठ २५ गतेसम्म कर तिर्न आग्रह गरेको छ ।

त्यस कुरालाई इंगित गर्दै थापाले अर्थमन्त्रीले व्यवसाय कसरी चल्छ भन्ने मात्र किताब पढेको आरोप लगाएका छन् ।नेता थापाले २ महिना लकडाउनमा राखेर कर तिर्न दिएको आदेशको विरोध समेत गरेका छन् । उनले भनेका छन्, “अर्थमन्त्रीज्युले व्यवसाय कसरी चल्छ भन्ने किताबमा मात्र पढ्नु भएको भएर नै होला,२ महिना लकडाउनमा राखेर, लकडाउनकै अवधिको ५ दिनको समय दिएर कर तिर्न हुकुम भएको !!”

अर्थमन्त्री डा युवराज खतिवडालाई विद्धानको संज्ञा दिँदै नेता थापाले कर तिर्ने कार्यालयमा लाइनमा बस्दा चाँही कोरोना संक्रमणको डर नहुने रहेछ ? भन्दै प्रश्न गरेका छन् ।