जनकपुरको बीच सडकमा पैसा फालेर भागेका २ महिला पक्राउ

काठमाडौं । कोरोना भाइरसको त्रासको बेलामा सडकमा पैसा फालेर भागेको आरोपमा प्रहरीले जनकपुरबाट दुई जना महिलालाई पक्राउ गरेको छ ।

शुक्रबार जनकपुरधामको महावीर चोक स्थित पेठीया बजार जाने सडकमा १० को दर्जनौं नोट फालेर भागेको स्थानीयको उजुरीको आधारमा जिल्ला प्रहरी कार्यालय धनुषाले दुई जनालाई महिलालाई पक्राउ गरेको हो । बरामद गरिएका रूपैयाँलाई परीक्षणका लागि प्रादेशिक अस्पताल जनकपुरधाम पठाइएको थियो ।

जानकी मन्दिर नजिकैबाट शनिबार ती दुवैजना महिलालाई पक्राउ गरिएको जिल्ला प्रहरी कार्यालय धनुषाले जनाएको छ । सिसिटीभी फुटेजहरु झिकाएर अध्ययन गर्दा उनीहरुको भूमिका शंकास्पद देखिएको र प्रहरीले सार्वजनिक गरेको हुलिया पनि मिलेकाले स्थानीयकै सहयोगमा ती दुवै महिलालाई पक्राउ गरेको प्रहरीले बताएको छ ।

शुक्रवार उनीहरुले जथाभावी १० रुपैयाँको नोट छरेको स्थानीयको भनाइ छ । रुपैयाँ किन फ्यालेको भनि सोध्दा ती महिलाहरु कुनै जवाफ नदिइ फरार भएका थिए ।

घटनाबारे थप अनुसन्धान भइरहेको जिल्ला प्रहरी कार्यालय धनुषाले जनाएको छ ।