ब्रिगेडलाई पराजित गर्दै आर्मी लिगको शीर्ष स्थानमा

काठमाडौं । त्रिभुवन आर्मी क्लब सहिद स्मारक ए डिभिजन लिग फुटबलको शीर्ष स्थानमा उक्लिएको छ ।

सातदोबाटोस्थित एन्फा कम्प्लेक्समा मंगलबार भएको खेलमा ब्रिगेड ब्वाईज क्लबलाई ३-० गोल अन्तरले पराजित गर्दै आर्मी शीर्ष स्थानमा उक्लिएको हो ।

आर्मीको जितमा कप्तान भरत खवास, विकास तामाङ र टेक बहादुर बुढाथोकीले एक एक गोल गरे । खेलको पाँचौं मिनेटमा कप्तान भरतले गोल गर्दै आर्मीलाई सुरुवाती अग्रता दिलाएका थिए ।

खेलको ५४ औं मिनेटमा विकास तामाङले गोल गर्दै आर्मीको अग्रता २-० को बनाए । खेलको ७० औं मिनेटमा टेकले गोल गर्दै आर्मीलाई ३-० को जित दिलाए । जितसँगै आर्मीले शीर्ष स्थानमा १ अंकको अग्रता बनाएको छ ।

आर्मीले १२ खेलमा २९ अंक जोडेको छ । दोस्रो स्थानको मछिन्द्रको २८ अंक रहेको छ । ब्रिगेड ८ अंक जोडेर १२ औं स्थानमा रहेको छ ।