नेप्से दोहोरो अङ्कले घट्यो

काठमाडौं । आइतबार दोहोरो अङ्कले ओरालो लागेको धितोपत्र बजारमा शेयर कारोवार मापक नेप्से परिसूचक आज पनि सोही लय पछ्याएको छ । कारोवार शुरु भएलगत्तैदेखि ओरालो लागेको बजार बन्द हुने समयसम्म पनि सोही अवस्थामा रह्यो ।

नेपाल स्टक एक्सचेञ्जका अनुसार नेप्से १६ दशमलव १८ बिन्दु अर्थात् १ दशमलव ४२ प्रतिशतले घटेर एक हजार १२३ दशमलव ८३ बिन्दुमा पुगेको छ । यस्तै सेन्सेटिभ परिसूचकसमेत १ दशमलव ४६ अर्थात् ३ दशमलव ६६ बिन्दुले घटेर २४६ दशमलव ३५ बिन्दुमा ओर्लिएको छ ।

नेप्से दोहोरो अङ्कले घटे पनि आइतबारको तुलनामा कारोवार रकम भने बढेको छ । कूल १६९ कम्पनीको १२ लाख ४८ हजार ४०९ कित्ता शेयर ३४ करोड ३९ लाख १८ हजार २२१ मूल्यमा खरीद बिक्री भए । आइतबार कूल १६२ कम्पनीको शेयर २८ करोड ८० लाख ९९ हजार ९१२ बराबरको कारोवार भएको थियो ।

स्टकका अनुसार कारोवारका आधारमा आज छिमेक लघुवित्त विकास बैंक शीर्ष स्थानमा रहेको छ । सो बैंकको एक करोड ८० लाख १९ हजार ९४५ बराबरको कारोवार भयो ।

यस्तै नेपाल बैंकएक करोड ७९ लाख ८३ हजार ३१६, सिटिजन बैंक रु एक करोड ४९ लाख ४४ हजार १९५, एनआइसी एशिया एक करोड १९ लाख ९५ हजार ४५५, सिद्धार्थ बैंक एक करोड १९ लाख २७ हजार ७९५, नेपाल लाइफ इन्स्योरेन्स एक करोड १२ लाख ३७ हजार ३८७ र शिवम् सिमेन्टको शेयर ९७ लाख ७० हजार ५३८ मूल्यमा कारोवार भई शीर्ष स्थानमा रहे ।

यस्तै घटेको बजारमा साल्ट टे«डिङका लगानीकर्ताले ३ दशमलव ९८ प्रतिशतले कमाए । एनएमबी माइक्रोफाइनान्स वित्तीय संस्था २ दशमलव ९३, छ्याङदी हाइड्रोपावर २ दशमलव ५३, गणपति माइक्रोफाइनान्स वित्तीय संस्था २ दशमलव ४६ र सिर्जना फाइनान्सका लगानीकर्ताले २ दशमलव ०४ प्रतिशतले कमाए ।

त्यस्तै नेशनल लाइफ इन्स्योरेन्स कम्पनीका लगानीकर्ताले ७ दशमलव ०९, सिनर्जी पावर ६ दशमलव ०६, आइएमई जनरल इन्स्योरेन्स ५ दशमलव ७३, एनएलजी इन्स्योरेन्स ५ दशमलव ६७, युनियन हाइड्रोपावर ५ दशमलव ५५ र लुम्बिनी जनरल इन्स्योरेन्सका लगानीकर्ताले ५ दशमलव ४० प्रतिशतले गुमाए ।