काठमाडौं – नेत्र विशेषज्ञ प्रा.डा. सन्दुक रुइतलाई पनि डेंगु भएको छ । डेंगुको संक्रमणपछि उहाँलाई थापाथलीको नर्भिक अस्पतालमा भर्ना गरिएको छ । रुईतसहित परिवारका तीन जनालाई डेंगुको संक्रमण भएको छ । पछिल्लो समय देशव्यापी रूपमै डेंगु संक्रमण बढेको छ ।
डेंगुका लक्षणहरु
डेंगु ज्वरोको मुख्य लक्षण भनेको एक्कासी उच्च ज्वरो आउनु हो । यो ज्वरो ५ देखि ७ दिनसम्म रहन सक्छ । ज्वरोका साथै निम्न लक्षणहरू पनि देखा पर्दछ ।
१. टाउको दुख्ने
२. आँखाको गेडी तथा आँखाको पछिल्लो भाग दुख्ने
३. ढाड, जोर्नी तथा मांसापेशिहरू दुख्ने
४. शरीरमा विमिरा आउने
५. वाकवाकी लाग्ने
६. पेट दुख्ने
७. नाक वा गिजाबाट रगत बग्ने
८. रक्तश्राव हुने वा शरीरमा रगत जमेको दागहरू देखापर्ने, बेहोश हुने आदि लक्षणहरू पनि देखा पर्न सक्छ ।
कसरी बच्ने ?
डेंगुबाट बच्ने मुख्य उपाय भनेको लामखुट्टेबाट बच्नु नै हो । लामखुट्टे पानीमा बस्ने भएकोले घरको वरपर वा पानी जम्ने ठाउँहरु जस्तै: गमला, फुलदान, खाली बट्टा, अलकत्रा वा मट्टितेलका खाली ड्रमहरू, गाडीका काम नलाग्ने टायरहरू आदिमा पानी जम्न दिनु हुँदैन ।
बाहिर वा लामखुट्टेले तोक्ने ठाउमा निस्कदा शरिर ढाकिने लुगा लगाउनुपर्छ ।
सुत्दा अनिवार्य झुलको प्रयोग गर्नु पर्छ, साथै साना केटाकेटीलाई जुनसुकै समयमा पनि झुल भित्र सुताउनु पर्दछ ।
