जनकपुरधाम, २६ भदौ- स्थानीय तह निर्वाचनमा एकै परिवारबाट दुई जनाले फरक दलबाट उम्मेदवारी दिएपछि पारिवारिक सदस्यहरूबीच पनि राजनीतिक विभाजन देखिएको छ । बुवाले छोरालाई, छोराले बुवालाई, भाइले दिदीलाई, दिदीले भाइलाई पनि मत नदिने अवस्था देखिएको छ ।
‘राजनीतिले सम्बन्धलाई पनि छोड्दैन,’ जनकपुरका राजनीतिक विश्लेषक डा. भोगेन्द्र झाले भने । जनकपुर उपमहानगरपालिकामा बुवा र छोरा फरकफरक पार्टीबाट उम्मेदवार बनेका छन् । जनकपुर ५ का ६४ वर्षीय युसुफ साफी धोबीले राप्रपाबाट उपप्रमुख पदका लागि उम्मेदवारी मनोनयन दर्ता गराएका छन् भने उनका छोरा २८ वर्षीय इद मोहम्मद साफीले राष्ट्रिय जनता पार्टी नेपालबाट जनकपुर उपमहानगरपालिका–५ को वडाअध्यक्षमा उम्मेदवारी मनोनयन दर्ता गराएका छन् ।
बुवाछोरा नै फरकफरक पार्टीबाट उम्मेदवार बनेपछि परिवारको मत विभाजन हुने भएको छ । राप्रपाबाट उपप्रमुखका उम्मेदवार बनेका बुवा युसुफले आफूले आफ्नै दलको उम्मेदवारलाई भोट दिने बताए । ‘म आफ्नो पार्टीका लागि भोट माग्छु, छोरालाई भोट दिन्नँ,’ उनले भने । यसैगरी छोरा इद मोहम्मद पनि आफूले उम्मेदवारी दिएको पार्टी राजपाका उम्मेदवारलाई नै परिवारका सदस्यसमेतले मतदान गर्ने बताउँछन्, राजधानी दैनिकमा खबर छ ।
